سابق وزیراعظم راجیو گاندھی کے یوم پیدائش کے موقع پر وزیراعظم نریندر مودی، کانگریس کے سابق صدر راہل گاندھی سمیت ملک کے کئی اہم شخصیتوں نے خراج عقیدت پیش کیا ہے۔
سابق وزیراعظم آنجہانی راجیو گاندھی کا آج 76 واں یوم پیدائش ہے۔
وزیراعظم نریندر مودی نے جمعرات کو سابق وزیراعظم راجیو گاندھی کے یوم پیدائش پر انہیں خراج عقیدت پیش کیا۔
نریندر مودی نے آنجہانی راجیو گاندھی کے یوم پیدائش کے موقع پر گلہائے عقیدت پیش کرتے ہوئے کہا کہ ’’سابق وزیراعظم راجیو گاندھی کو ان کے یوم پیدائش پر گلہائے عقیدت‘‘۔
کانگریس کے سابق صدر راہل گاندھی نے اپنے والد سابق وزیراعظم آنجہانی راجیو گاندھی کے یوم پیدائش پر جمعرات کے روز گلہائے عقیدت نذر کرتے ہوئے کہا کہ وہ ایک لبرل اور محبت کرنے والے شخص تھے۔
راہل گاندھی نے اپنے والد کو گلہائے عقیدت پیش کرتے ہوئے فوٹو کے ساتھ ٹوئٹ کیا ’’راجیو گاندھی ایک غضب کا نظریہ رکھنے والے اور اپنے وقت سے بہت آگے کے انسان تھے لیکن ان سب سے الگ وہ ایک لبرل اور محبت کرنے والے انسان تھے‘‘۔
انھوں نے مزید لکھا ’’میں اپنے باپ کے طور پر انہیں پاکر خود کو بہت خوش قسمت اور فخر محسوس کرتا ہوں۔ ہم انہیں آج اور ہر دن یاد کرتے ہیں‘‘۔
کانگریس کے سینئر رہنما اور خزانچی احمد پٹیل نے ٹویٹ کرتے ہوئے لکھا کہ ''راجیو جی کی سیاسی زندگی مختصر تھی لیکن اس عرصے میں وہ قوم کی ترقی کو ایک نئی سمت دینے میں کامیاب ہوئے۔ ان کا ماننا تھا کہ بھارت کے اتحاد کو اس کے ڈائیورسٹی نے مضبوط کیا ہے۔ ان کے یوم پیدائش کے موقع پر خود کو ان کے نظریات سے منسلک کرنا بہترین خراج تحسین ہے۔''
آنجہانی راجیو گاندھی ملک کے چھٹے اور سب سے کم 40 برس کی عمر میں وزیراعظم بنے تھے۔ ان کی مدت کار 1984 سے 1989 تک تھی۔
