مغربی بنگال کے مرشدآباد ضلع کے بیل ڈانگہ کے حاجی علی گرام میں نامعلوم شرپسندوں کے حملے میں ترنمول کانگریس کے سرگرم کارکن کو قتل کیا گیا.
یہ واقعہ آج صبح اس وقت پیش آیا جب ترنمول کانگریس کے رہنما نماز ادا کرکے مسجد سے گھر واپس جا رہے تھے تبھی ان پر شرپسندوں نے حملہ کر دیا.
حملے میں ترنمول کانگریس کے رہنما موقع پر ہی ہلاک ہو گئے.
اس واقعے کے بعد پورے علاقے میں سنسنی پھیل گئی.
مقامی باشندوں نے ترنمول کانگریس کے رہنما کی لاش کو سڑک پر روک کراحتجاج کیا اور ناکہ بندی کردی.
پولیس نے جائے وقوع پر پہنچ کر حالات کو قابو میں کیا اور لوگوں کو سمجھا کر ناکہ بندی ختم کرائی.
پولیس کا کہنا ہے کہ ہلاک ہونے والے شخص کی شناخت عبدالرشید شیخ کے طور پر ہوئی ہے.
نامعلوم شرپسندوں کے حملے میں ان کی جائے وقوع پر ہی موت ہو گئی تھی.
پولیس نے کہا کہ پورے معاملے کی تفتیش کی جا رہی ہے لیکن اب تک اس معاملے میں ملوث افراد کی گرفتاری عمل میں نہیں آئی ہے.
ان کی تلاش جاری ہے. پولیس قتل کی واردات کو مختلف زاوئیے سے تفتیش کر رہی ہے اور یہ پتہ لگانے کی کوشش کر رہی ہے کہ آپسی رنجش, کاروباری رنجش یاپھر سیاسی انتقام کا معاملہ تو نہیں ہے۔
مزید پڑھیں:
ذرائع کے مطابق مقتول عبدالرشید شیخ ترنمول کانگریس کے رہنما ہمایوں کبیر کے قریبی بتائے جاتے ہیں.
ترنمول کانگریس کے رہنما ہمایوں کبیر اور رکن اسمبلی روبل عالم کے درمیان تنازعہ چل رہا ہے.
چند دنوں قبل دونوں کے حامیوں کے درمیان جھڑپ ہوئی تھی.
کانگریس اور بی جے پی نے رہنما کے قتل کو ترنمول کانگریس کے گروہی تصادم کا نتیجہ قرار دیا۔
