پی ایم او کی جانب سے ٹویٹ کرکے یہ اطلاع دی گئی ہے کہ وزیر اعظم نریندر مودی نے اجمیر کے لیے چادر روانہ کردی۔
تصویروں میں دیکھا جا سکتا ہے کہ مودی نے ایک وفد کے حوالے چادر پیش کی ہے۔ جہاں ان کے ساتھ مرکزی اقلیتی وزیر مختار عباس نقوی بھی موجود ہیں۔ ساتھ ہی دیگر اعلیٰ حکام بھی نطر آئے۔
آج ہی اجمیر درگاہ کمیٹی کے ایک وفد نے وزیر اعظم نریندر مودی سے ملاقات کی۔ جہاں کمیٹی کے سربراہ نے وزیر اعظم کے ساتھ ملک میں امن و سلامتی اور آپسی بھائی چارے و اتحاد کے لیے دعا بھی مانگی۔
مرکزی اقلیتی وزیر مختار عباس نقوی، پیش کردہ چادر کو حکومت ہند کی جانب سے آنے والی 25 فروری کو اجمیر میں خواجہ غریب نواز کی بارگاہ میں بذات خود پیش کریں گے۔
چادر پیش کرنے کے دوران مختار عباس نقوی وزیر اعظم کا پیغام پہنچاتے ہوئے عوام سے ملک میں امن و سلامتی بنائے رکھنے کی اپیل بھی کریں گے۔
غور طلب ہے کہ معروف صوفی بزرگ حضرت خواجہ معین الدین اجمیری کا عرس ہر برس بڑی دھوم دھام سے منایا جاتا ہے۔ جس میں ملک و بیرون ممالک سے لاکھوں عقیدت مند شریک ہو کر اپنی عقیدت کا نذرانہ پیش کرتے ہیں۔
وہیں ہر برس حکومت ہند کی جانب سے خواجہ کی بارگاہ میں چادر پیش کی جاتی ہے۔