سشانت کیس: 21 اگست کو اجے اگروال کی درخواست پر سماعت

اگروال نے مفاد عامہ کی اپنی عرضی میں کہا ہے کہ 'جس طرح ممبئی پولیس اس معاملے کی تحقیقات کر رہی ہے، اس سے پورا ملک حیران ہے اور اس کے لئے مربوط تفتیش ضروری ہے۔'

سپریم کورٹ نے اداکار سشانت سنگھ راجپوت کی موت کی تحقیقات کے لئے بھارتیہ جنتا پارٹی کے رہنما اور وکیل اجے اگروال کی درخواست پر سماعت جمعرات کو 21 اگست تک ملتوی کر دی۔

چیف جسٹس شرد اروند بوبڈے، جسٹس اے ایس بوپنا اور جسٹس وی راما سبرامنیم کی ڈویژن بینچ نے درخواست گزار کی علالت کے سبب سماعت ملتوی کرنے کا فیصلہ کیا۔

اگروال نے ایک خط لکھا تھا جس میں ان کے علیل ہونے کی وجہ سے سماعت میں شرکت نہ کرنے کا حوالہ دیا گیا تھا جس کے بعد سماعت اگلے ہفتے جمعہ تک کے لئے ملتوی کر دی گئی۔

اگروال نے مفاد عامہ کی اپنی عرضی میں کہا ہے کہ 'جس طرح ممبئی پولیس اس معاملے کی تحقیقات کر رہی ہے اس سے پورا ملک حیران ہے اور اس کے لئے مربوط تفتیش ضروری ہے۔'

عدالت عظمیٰ نے اس سے قبل 30 جولائی اور 7 اگست کو الکا پریا اور ممبئی میں مقیم قانون کی طالب علم دویندر دوبے کی مفاد عامہ کی درخواستوں کو خارج کر دیا تھا۔

اہم بات یہ ہے کہ 7 اگست کو عدالت نے دوبے کی درخواست مسترد کرتے ہوئے کہا تھا کہ 'مقتول کے والد نے اس معاملے میں خود ہی عدالت سے رجوع کیا ہے لہذا اس میں کسی دیگر کی مداخلت کی ضرورت نہیں ہے۔'