رامبن: صاف پانی کی قلت سے پریشان لوگوں کا احتجاج

رامبن قصبہ اور گرد و نواح علاقوں میں پانی کی سپلائی بری طرح متاثر ہوئی ہے اور قصبہ کے رہائشیوں کو بے حد دشواریوں کا سامنا کرنا پڑ رہا ہے۔ رامبن قصبہ میں صاف پانی کی سپلائی مکمل طور بند ہو گئی ہے۔

جموں کشمیر کے ضلع رامبن کی سب ڈویژن گول کے دور دراز پنچایت فمروٹ میں سینکڑوں لوگوں نے بلاک صدر سنگلدان میں پینے کے صاف پانی کی عدم سپلائی پر محکمہ پی ایچ ای اور ضلغ انتظامیہ کے خلاف احتجاج کیا۔

احتجاج کر رہے لوگوں نے بتایا کہ علاقے میں کئی ماہ سے پینے کے صاف پانی کی زبردست قلت ہے اور لوگ صاف پانی کی بوند کیلئے ترس رہے ہیں۔

پوری پنچایت میں صاف پانی کی سپلائی مکمل طور بند ہو گئی ہے، جس کے سبب پانی کی قلت پیدا ہو گئی۔ کئی بار محکمہ جل شکتی کے افسران سے گذارش کی گئی، لیکن کوئی حل نہیں نکلا۔ آخرکار لوگ ندی نالوں سے پانی لانے پر مجبور ہو گئے۔

سرپنچ فمروٹ نے کہا بیک ٹو ولیج مرحلہ سویم میں نوڈل افسر نے پینے کے صاف پانی کی سپلائی کو یقینی بنانے کی بات کہی تھی، اس کے باوجود لوگوں کو بے حد دشواریوں کا سامنا کرنا پڑ رہا ہے۔

انہوں نے کہا کہ آنے والے موسم سرما میں پہاڑی علاقوں میں سخت برف باری ہوتی ہے اور اس وقت لوگوں مزید مشکلات کا سامنا کرنا پڑے گا۔

انہوں نے جموں و کشمیر کے لیفٹیننٹ گورنر سے گذارش کی ہے کہ وہ آنے والی برف باری سے قبل پانی کی سپلائی کو یقینی بنانے کے احکامات جاری کریں۔