جھارکھنڈ انتخابات کے موقع پر فائرنگ ، ایک ہلاک دو زخمی

جھارکھنڈ اسمبلی انتخابات کے دوسرے مرحلے میں پولیس فائرنگ میں ایک شخص ہلاک اور دو زخمی ہوگئے۔ یہ واقعہ ضلع گملہ کے سیسا اسمبلی حلقہ کے بگھینی بوتھ پر پیش آیا۔

اس پر تشدد واقعہ کے بعد رائے دہی معطل ہوگئی ہے اور پولیس نے ایس پی اے کے جھا کی قیادت میں پہنچ کر انتخابی عملہ کو بحفاظت وہاں سے باہر نکال لیا۔

پولیس فائرنگ میں ہلاک ہونے والے شخص کا نام جیلانی انصاری بتایا جارہا ہے جبکہ اشفاق انصاری اور تھوپا انصاری زخمی ہوگئے۔ اطلاعات کے مطابق پولنگ بوتھ کے اندر گربڑ کی کوشش کی گئی جس کے بعد یہ واقعہ رونما ہوا۔

پولیس نے پولنگ بوتھ کے اندر فائرنگ کی جس میں اشفاق نامی شخص زخمی ہوگیا۔ اس کے بعد مشتعل ہجوم نے پولیس پر پتھراؤ شروع کردیا جس میں ایک انسپکٹر زخمی ہوگئے۔

پولیس فائرنگ میں جیلانی انصاری نامی شخص ہلاک ہوگیا جبکہ اشفاق انصاری اور تھوپا انصاری زخمی ہوگئے۔ باگھانی گاؤں میں پولیس کی بھاری نفری تعینات کی گئی ہے۔