کسان ریلی کے پیش نظر سکیورٹی الرٹ

اپنے مختلف مطالبات کو لے کر کسان آج دہلی پہنچ رہے ہیں۔ انھیں روکنے کے لیے دہلی پولیس نے قومی شاہراہ پر اپنے مختلف فوجی دستوں کو لگایا ہے اور بیریکیڈنگ کی ہے، تاکہ کسان دہلی میں داخل نہ ہو سکیں۔

صبح سے ہی سکیورٹی کا جائزہ لیتے ہوئے غازی آباد کے ضلع مجسٹریٹ اجئے شنکر پانڈے ، ایس ایس پی سدھیر کمار سنگھ سمیت تمام اعلیٰ افسران موقع پر موجود تھے۔

واضح رہے کہ گذشتہ روز افسران کی ایک جماعت کسانوں سے ملنے کے لیے نوئیڈا گئی تھی۔ لیکن بات چیت کے بعد بھی کسانوں سے بات نہیں بنی۔

11 ستمبر کو شروع ہوئی مغربی اترپردیش سے گنا کسانوں کی یہ پیدل ریلی دو روز قبل نوئیڈا پہنچی تھی۔ کسانوں کا کہنا ہے کہ ہمارا کوئی مطالبہ نہیں ہے، بلکہ ہم اپنا بنیادی حق مانگ رہے ہیں۔ حکومت نے وعدہ کیا تھا کہ ہمارا قرض معاف کیا جائے گا، دوسری بنیادی ضروریات ہمیں فراہم کی جائیں گی لیکن کچھ نہیں ہوا۔

جس کے سبب آج کسان دہلی کوچ کر رہے ہیں۔ اس کی اطلاع انتظامیہ کو ملی تو اترپردیش دہلی بارڈر شاہراہ پر سکیورٹی لگا دی گئی۔ تاکہ کسانوں کو دہلی میں داخل ہونے سے روکا جا سکے۔