’سندھیا سوائن فلو میں مبتلا ہیں‘

مدھیہ پردیش میں جاری سیاسی بحران کے درمیان کانگریس پارٹی کے سینیئر رہنما دگ وجئے سنگھ نے جیوتی رادھتیا سندھیا پر تبصرہ کرتے ہوئے کہا کہ وہ ان سے رابطہ نہیں کر پا رہے ہیں۔

انہوں نے مزید کہا کہ سندھیا سے رابطہ کرنے کی کوشش کی گئی، مگر معلوم ہوا کہ انہیں سوائن فلو ہے، اس لیے وہ رابطہ نہیں کر پائیں گے۔

اس موقع پر دگ وجئے سنگھ نے کہا کہ جو سچے کانگریسی ہیں، وہ پارٹی میں رہیں گے اور جو پارٹی کو چھوڑ کر جا رہے ہیں انہیں عوام کی جانب سے بہتر جواب ملےگا۔

ذرائع کے مطابق، جیوتی رادھتیا اور ان کے کیمپ کے ارکان پارلیمان اور اسمبلی ممبران سمیت کانگریس کے 11 ممبران کے موبائل فون بند پائے گئے ہیں۔

یہ اس وقت سامنے آیا ہے جب مدھیہ پردیش میں تقریبا 20 کابینہ وزراء نے اپنا استعفیٰ وزیر اعلی کمل ناتھ کو پیش کیا ہے۔

وزیراعلیٰ نے استعفیٰ قبول کرلیا ہے اور امکان ہے کہ وہ کابینہ کی تشکیل کریں گے۔

اس سے قبل، کانگریس کے متعدد رہنماؤں نے بی جے پی پر مدھیہ پردیش میں کمل ناتھ کی قیادت والی کانگریس حکومت کو گرانے کی سازش کا الزام لگایا تھا۔