بھارت کےکھیلنے، ناکھیلنے سے ہمیں کوئی فرق نہیں پڑتا: سرفراز

پلوامہ حملے کے بعد یہ مطالبہ زور پکڑ رہا تھا کہ رواں برس انگلینڈ میں ہونے والے یک روزہ عالمی کپ میں بھارت، پاکستان کے خلاف میچ کا بائیکاٹ کرے، اب اس پر پاکستان کے کپتان سرفراز احمد نے ایک بڑا بیان دیا ہے۔

پاکستان کرکٹ ٹیم کے کپتان سرفراز احمد نے پریس کانفرنس سے مخاطب ہوتے ہوئے کہا کہ عالمی کپ میں بھارتی ٹیم پاکستان سے میچ کھیلے یا نہ کھیلے ہمیں اس سے کوئی فرق نہیں پڑتا۔ ہم صرف اپنے روایتی کھیل پر توجہ دینا چاہیں گے اور اپنی بہترین کارکردگی پیش کریں گے۔

پاکستان کرکٹ ٹیم کے کپتان سرفراز احمد

سرفراز نے کہا کہ میں اس بارے میں زیادہ باتیں نہیں کرنا چاہتا، بس اتنا کہنا چاہتا ہوں کہ بھارتی ٹیم پاکستان سے میچ کھیلے یا نا کھیلے یہ ان کا ذاتی معاملہ ہے ہمیں اس میں کوئی پریشانی نہیں ہے۔

واضح رہے کہ عالمی کپ شیڈول کے مطابق بھارت اور پاکستان کے مابین 16 جون کو مقابلہ ہونا طئے ہے لیکن اس پر اب بھی تذبذب برقرار ہے کہ بھارتی ٹیم میچ کھیلے گی یا نہیں۔