راجیو کمار کی تلاش کیلئے سی بی آئی نے سی آر پی ایف سے مدد طلب کی

شاردا چٹ فنڈ بدعنوانی معاملے میں ثبوتوں کے ساتھ چھیڑ چھاڑ کے الزامات کا سامنا کر رہے سینیئر آئی پی ایس آفیسر راجیو کمار کو تلاش کرنے کیلئے سی بی آئی نے سی آر پی ایف کی مدد طلب کی ہے۔

راجیو کمار کی پیش گی ضمانت کی عرضی پر اگلے ہفتے سوموار کو سماعت ہونے کی امید ہے۔ سی بی آئی کلکتہ ہائی کورٹ کے فیصلے کا بھی انتظار کررہی ہے۔
اس درمیان سی بی آئی کی ٹیم نے سی آر پی ایف کے دفتر میں آج جا کر سینئر آئی پی ایس آفیسر راجیو کمار کو تلاش کرنے میں مدد مانگی ہے تاہم سی آر پی ایف سے مدد مانگنے پر تنازع بھی کھڑا ہوگیا ہے کہ کیا سی آر پی ایف اس طرح کے کیسز میں کام کرسکتی ہے؟۔

عدالتوں سے بار بار مایوسی کا سامنا کررہے راجیو کمار کیلئے اب کلکتہ ہائی کورٹ سے امیدیں باقی ہیں۔گزشتہ دو ہفتے سے زائد عرصے سے وہ چھٹی پر ہیں۔کل ہی ان کی چھٹی ختم ہوگئی ہے مگر انہوں نے اب تک بنگا ل سی آئی ڈی کے ایڈیشنل ڈائریکٹر جنرل کا عہدہ نہیں سنبھالا ہے۔

راجیو کمار کو تلاش کرنے کیلئے سی بی آئی کی خصوصی ٹیم گزشتہ ہفتے کلکتہ آئی تھی، متعدد مقامات پر چھاپہ مارنے اور مایوسی ہاتھ لگنے کے بعد کل دہلی واپس ہوگئی ہے۔کلکتہ ہائی کورٹ سے گرفتاری پر روک ختم کیے جانے کے بعد سے ہی سی بی آئی کلکتہ پولس کے سابق کمشنر راجیو کمار کو کئی سمن جاری کرچکی ہے مگر وہ پیش نہیں ہوئے ہیں۔