پرنب مکھرجی کی حالت ہنوز نازک

سابق صدر جمہوریہ ہند پرنب مکھرجی کی صحت میں پیر کے روز بھی بہتری نہیں آئی اور ان کی حالت بدستور نازک بتائی جا رہی ہے۔

آرمی ہسپتال کی جانب سے جاری کردہ ہیلتھ بلیٹن میں آج صبح بتایا گیا کہ پرنب مکھرجی کی حالت اب بھی تشویشناک ہے اور ان پر لگاتار نظر رکھی جارہی ہے۔

دہلی کینٹ کے آرمی ریسرچ اینڈ ریفرل اسپتال کے ہیلتھ بلیٹن میں بتایا گیا کہ سابق صدر جمہوریہ پرنب مکھرجی کی حالت تشویشناک ہے اور وہ بدستور وینٹی لیٹر پر ہیں۔

پرنب مکھرجی کی طبیعت خراب ہونے کے بعد انہیں 10 اگست کو آرمی کے ریسرچ اینڈ ریفرل اسپتال میں داخل کرایا گیا تھا جہاں ان کے دماغ میں خون جمنے کے بعد ان کا ؤپریشن کیا گیا اس کے بعد سے ان کی حالت غیر مستحکم ہے جبکہ پرنب مکھرجی کی کورونا رپورٹ بھی مثبت آئی ہے۔

واضح رہے کہ اتوار کے روز ان کے صاحبزادے ابھیجیت مکھرجی نے ٹویٹ میں کہا تھا کہ 'ان کی(پرنب مکھرجی) صحت گزشتہ دنوں کے مقابلہ میں کافی اچھی اور مستحکم ہے۔ تمام بڑے اعضا مستحکم ہیں اور علاج کا اثر ہو رہا ہے۔ ہمیں یقین ہے کہ وہ جلد ہی ہمارے درمیان ہوں گے۔