ریاست مہاراشٹر میں تھانے پولیس نے مہاراشٹر اور کرناٹک کے 600 سے زیادہ کسانوں سے دھوکہ دہی کرکے کروڑوں روپے کا سامان لے کر فرار ہونے والے ملزمین کو گرفتار کیا ہے۔
یہ ملزمین کسانوں سے کاجو و دیگر اشیا کی خریداری کر کے ان کی قیمت ادا کئے بغیر فرار ہو گئے تھے۔ پولیس نے ان ملزمین کو گرفتار کر انکے قبضے سے 2کروڑ 20 لاکھ روپے کا مال برآمد کرنے کا دعویٰ کیا ہے۔
اس کیس میں ابھی بھی کچھ ملزمین فرار ہیں
تھانے پولیس کمشنر وویک پھنسالکر کا کہنا تھا: 'جولائی 2018 میں ہمیں شکایت موصول ہوئی کہ کسانوں سے کاجو خرید کر انکی رقم دیئے بغیر کئی ملزمین فرار ہیں، اس طرح کا پہلا معاملہ تھانے کے 'کاپور باوڑی پولیس اسٹیشن' میں کولہا پور کے کسان شوکت مجاور کی شکایت پر جولائی میں مختلف دفعات درج کر کسانوں کے ساتھ دھوکہ دہی کرنے والے ملزمین کی تلاش کا ذمہ کرائم برانچ یونٹ ون کو سونپا گیا ہے'۔