جامعہ ملیہ سے شاہین باغ تک 'سی اے اے' کی مخالفت میں مارچ

شہریت ترمیمی قانون کے خلاف ملک بھر میں احتاج اور مظاہروں کا سلسلہ جاری ہے، ملک کی تاریخ میں یہ پہلا ایسا مظاہرہ ہے جس میں استقلال ہے۔ گزشتہ ایک ماہ سے دارالحکومت دہلی کے شاہین باغ میں مظاہرہ شروع ہوا اور رفتہ رفتہ ملک کے متعدد مقامات اور ریاستوں میں شاہین باغ بنتا چلا گیا۔

دارالحکومت دہلی کے جامعہ ملیہ اسلامیہ یونیورسٹی کے گیٹ سے شاہین باغ تک مظاہرین نے اتوار کے روز سی اے اے کے خلاف احتجاجی مارچ کیا اس مارچ میں خواتین اور بچوں سمیت سیکڑوں افراد نےشرکت کی اور سی اے اے اور این پی آر کو واپس لینے کا مطالبہ کیا۔

کچھ مقامی لوگ مہاتما گاندھی تو کچھ بی آر امبیڈکر بن کر مارچ کا حصہ بنے ہوئے تھے، تو وہیں تین لوگ قیدیوں کے لباس میں زنجیروں میں بندھے ہوئے شہید بھگت سنگھ، راج گرو اور سکھ دیو بنے تھے، مظاہرین 'آزادی' اور 'سی اے اے' این آرسی پر ہلہ بول' اور دیگر نعرے لگا رہے تھے۔

مارچ میں بہت سے لوگوں کے ہاتھ میں موم بتیاں تو کئی کے ہاتھ میں ' ہم سی اے اے، این آر سی این پی آر کو مسترد کرتے ہیں'، 'ہندو مسلم سکھ عیسائی، آپس میں ہیں بھائی بھائی' لکھی تختیاں تھیں۔

مظاہرین نے ایک جعلی 'حراست کیمپ' کو بھی ظاہر کیا ہوا تھا جس کے اندر مختلف مذاہب کے چھوٹے بچے بیٹھے تھے گزشتہ ایک ماہ سے زیادہ وقت سے قومی دارالحکومت کے شاہین باغ میں لوگ 'سی اے اے' کے خلاف تحریک چلا رہے ہیں۔