علی گڑھ مسلم یونیورسٹی (اے ایم یو) میں سرسید اکیڈمی کے زیر اہتمام 'حکمرانی، سیاست اور عوامی اہلکاروں کی ذمہ داری' کے موضوع پر صد سالہ یادگاری خطبہ 2020 آن لائن پیش کرتے ہوئے سابق جموں و کشمیر کے گورنر نریندر ناتھ ووہرا نے کہاکہ' ہم خوش قسمت ہیں کہ ہمارے ملک میں اے ایم یو کے بانی سرسید احمد خان جیسا دور اندیش رہنما تھا، وہ ایک عظیم اسکالر ہونے کے ساتھ ہی ایک ایسے وقت میں جب انگریز بھارت میں ہندو- مسلم کو تقسیم کرنے کی کوشش کر رہے تھے، تو ایسے نازک وقت میں وہ بھارت میں ہندو-مسلم اتحاد کے علمبردار بھی رہے۔
نریندر ناتھ ووہرا نے کہا کہ 'حکمرانی (گورنینس) میں کامیابی کیلئے پوری طرح وقف اور ایماندار سیاسی قیادت اور اہل مستعد عوامی اہلکار دونوں درکار ہوتے ہیں'۔ انہوں نے سول سروسیز کی حصولیابیوں کا ذکر کرتے ہوئے کہا کہ' جوابدہی برقرار رکھنے کے لئے آئین کی سختی سے پیروی کرنا ضروری ہے'۔
انہوں نے کہا کہ' مؤثر سیاسی اور عوامی خدمات کے لئے لازمی ہے کہ شفافیت اور مشاورت کے ساتھ کام کیا جائے اور حکمرانی میں ایکسیلینس کی ثقافت کو فروغ دیا جائے جس میں ایمانداری اور خدمات کی انجام دہی میں اعلی معیار کا خیال رکھا گیا ہو۔