یوم جمہوریہ تقریب واگھہ اٹاری سرحد پر منعقد نہیں کی جائے گی

رواں برس عالمی وبا کورونا وائرس کے پیش نظر یوم جمہوریہ کی تقریب واگھہ اٹاری سرحد پر منعقد نہیں کی جائے گی اور نہ کسی کو بھی وہاں جانے کی اجازت ہوگی۔

بارڈر سیکیورٹی فورسز کے مطابق رواں برس واگھہ اٹاری سرحد پر 26 جنوری کو یوم جمہوریہ کے موقع پر'بیٹنگ ریٹریٹ' تقریب (Beating Retreat Ceremony) کا انعقاد نہیں کیا جائے گا۔

ذرائع کے مطابق رواں برس عالمی وبا کورونا وائرس کے خدشات کے سبب یوم جمہوریہ کے موقع پر واگھہ اٹاری سرحد پر کسی طرح کی کوئی بھی تقریب منعد نہیں کی جائے گی۔ ساتھ ہی کووڈ-19 وبا کو دھیان میں رکھتے ہوئے کسی کو بھی یہاں آنے کی اجازت نہیں ہوگی۔ روزانہ شیڈیول کے مطابق ہی اس دن پرچم کشائی کی جائے گی۔

آپ کو بتادیں کہ' گذشتہ برس بھی یہاں خصوصی تقریبات کے موقع پر کسی کو داخلے کی اجازت نہیں دی گئی تھی اُس دوران 'بی ایس ایف' نے اپنے سولہ اہلکاروں کے ساتھ ہی پروگرام کیا تھا۔

'بیٹنگ ریٹریٹ' تقریب (Beating Retreat Ceremony) کا آغاز واگھہ اٹاری سرحد پر سنہ 1959 میں خیر سگالی کے طور پر کیا گیا تھا۔ سرحد پر پرچم کی رسومات کا اہتمام کرنا روزانہ کی فوجی مشق ہے، جسے پچھلے ساٹھ برسوں سے بھارت اور پاکستان کی سکیورٹی فورسز انجام دیتے آرہے ہیں۔