دھن تیرس کے موقع پر بازار میں سناٹا

ہندو مذہب کا مقدس تہوار دیوالی کی آمد ہے، دیوالی سے ایک روز قبل دھنتیرس کے موقع پر کچھ نئی چیز خریدنا شبھ مانا جاتا ہے مگر اس بار دھنتیرس کے موقع پر مختلف چوک چوراہوں اور بازار میں زیادہ چہل پہل دیکھنے کو نہیں مل رہی ہے۔

ایسے موقع پر مختلف کمپنیوں کی جانب سے سامان خریداری پر خصوصی رعایت بھی دی جاتی ہے۔ بازار میں الیکٹرانک آلات، فریزر، واشنگ مشین، موبائل، اسٹیل کے برتن وغیرہ کے دکانیں سج دھج کر تیار ہیں۔ دکاندار گراہک کے انتظار میں ہے، مگر کسی کسی دکان پر چند لوگ ہی خریداری کرتے ہوئے دکھائی دے رہے ہیں۔

سامان خریداری کے لئے آئی پریا جھا نے کہا کہ دھنتیرس میں ہم لوگ لکشمی دیوی کی پوجا کرتے ہیں، اس دن کچھ نہ کچھ نئی چیز خریداری کرتے ہیں، یہ روایت عرصہ دراز سے چلی آ رہی ہے۔ مگر اس بار بازار میں لوگ کم دکھائی دے رہے ہیں۔

اس کی وجہ لاک ڈاؤن ہے، لاک ڈاؤن کے سبب لوگوں کے جیب میں پیسے نہیں ہیں، پھر بھی ہم لوگ روایت کے مطابق حسب صلاحیت کچھ نہ کچھ خریداری کے لئے نکلے ہیں۔ کچھ چھوٹی موٹی چیزیں خرید کر واپس ہو جائیں گے۔

وہیں دکاندار شاہد رضا نے کہا کہ اس مرتبہ بازار بالکل ٹھنڈا ہے، گزشتہ سال لوگوں نے بڑھ چڑھ خریداری کی تھی۔ وجہ بتاتے ہوئے شاہد رضا کہتے ہیں ایک تو لاک ڈاؤن اور پھر ابھی اختتام پذیر ہوئے انتخاب کی وجہ سے لوگوں کی جیب میں روپے نہیں ہیں۔ ہم لوگ سال بھر آج کے دن کا انتظار کرتے ہیں مگر بازار سناٹا ہونے سے مایوس ہیں۔