وزیر اعظم نے نمامی گنگے پروجیکٹ کا جائزہ لیا

چندر شیکھر آزاد ایگریکلچر اور تکنالوجی یونیورسٹی کے آڈیٹوریم میں منعقدہ میٹنگ میں مسٹرمودی کو نمامی گنگے پروجیکٹ کی پیش رفت کے بارے میں بتایا گیا۔

گنگا ندی کو آلودگی سے پاک کرانےکا عہد کرنے والے وزیراعظم نریندر مودی نے گذشتہ روز چمڑے کی صنعت کے لئے مشہور کانپور میں نیشنل گنگا کونسل کی پہلی میٹنگ میں شرکت کی اور ندی کی صفائی کے لئے کیے جارہے کاموں کا جائزہ لیا۔

چندر شیکھر آزاد ایگریکلچر اور تکنالوجی یونیورسٹی کے آڈیٹوریم میں منعقدہ میٹنگ میں مسٹرمودی کو نمامی گنگے پروجیکٹ کی پیش رفت کے بارے میں بتایا گیا۔

تمام وزراء اعلیٰ نے اپنی اپنی ریاستوں میں گنگا کی صفائی کے تحت کامو ں کی جانکاری دی اس موقع پر اترپردیش کے وزیراعلی یوگی آدتیہ ناتھ، بہار کے نائب وزیراعلی سشیل مودی اور اتراکھنڈ کے وزیراعلی ترویندر سنگھ راوت موجود تھے۔ وزیراعلی نے اپنی اپنی ریاستوں میں گنگا کی صفائی کے تحت کامو ں کی جانکاری دی۔

تقریباً دو گھنٹے تک چلی جائزہ میٹنگ میں جل شکتی کے وزیر گجیندر سنگھ شیخاوت، وزیر خزانہ نرملا سیتارمن، دیہی ترقیات کے وزیر نریندر سنگھ تومر، وزیر صحت ڈاکٹر ہرش وردھن، ماحولیات اور جنگلات کے وزیر پرکاش جاوڈیکر، سیاحت اور ثقافت کے وزیرمملکت پرہلاد سنگھ پٹیل، توانائی کے وزیرمملکت راجکمار سنگھ، رہائش اور شہری ترقیات کے وزیرمملکت ہردیپ پوری اور جہاز رانی کے وزیر من سکھ منڈویا موجود رہے۔

سرکاری ذرائع نے بتایا کہ مسٹر مودی نے گنگا کی صفائی کے لیے کی جارہی کوششوں کی تعریف کی اور پروجیکٹ میں مزید تیزی لانے کے لئے کافی رقم دستیاب کرانے کی یقین دہانی کرائی۔

میٹنگ کے بعد انہوں نے وزرا اور حکام کے ساتھ ناشتہ کیا اور ان کا قافلہ گنگا کے درشن کے لئے اٹل گھاٹ کی طرف روانہ ہوا۔

اٹل گھاٹ پر سخت سیکورٹی کے درمیان مسٹر مودی اسٹیمر پر سوار ہوکر تقریبا دو کلومیٹر دور سرسیا گھاٹ کے لئے روانہ ہوئے۔

اٹل گھاٹ سے چند میٹر کی دوری پر گنگا کے درمیان میں انکا اسٹیمر تقریباپانچ منٹ تک کھڑا رہا۔ مسٹر مودی تقریبا نصف گھنٹہ گنگا کی گود میں رہے اور بند کیے گیے نالوں اور گنگا کی صفائی کا جائزہ لیا۔