غیرملکی سرمایہ کاری کی منظوری

حکومت نے راست غیر ملکی سرمایہ کاری (ایف ڈی آئی) کو فروغ دینے کے مقصد سے کوئلہ کانکنی کے شعبہ اور ٹھیکہ پر مصنوعات سازی میں سوفیصد ایف ڈی آئی کی اجازت دینے کے ساتھ ہی ڈیجیٹل میڈیا میں 26 فیصد ایف ڈی آئی کی منظوری دی ہے۔

سنگل برانڈ ریٹیلرز کو راحت دینے کے لیے مقامی ذرائع سے خرید کے ضابطوں میں کئی تبدیلیاں بھی کی گئی ہیں۔

وزیراعظم نریندرمودی کی صدارت میں مرکزی کابینہ کی بدھ کو دہلی میں ہوئی میٹنگ میں یہ فیصلے کیے گئے۔ میٹنگ کے بعد کامرس و صنعت کے وزیر پیوش گوئل نے میڈیا کو بتایا کہ کوئلہ کانکنی کے شعبہ میں ازخود منظوری کے عمل کے تحت 100 فیصد ایف ڈی آئی کی منظوری دی گئ ہے۔

کانکنی کے ساتھ ہی اس صنعت سے متعلق سبھی شعبوں جیسے کوئلہ کی دھلائی، چھنٹائی، پروسیسنگ اور فروخت کے کاروبار میں بھی سوفیصد راست غیر ملکی سرمایہ کاری کی جا سکے گی۔
گوئل نے کہا کہ بھارت کو مصنوعات سازی کا عالمی مرکز بنانے اور بین الاقوامی معیار کے مطابق مصنوعات سازی کو فروغ دینے کے مقصد سے ملک میں ٹھیکہ پر کسی تیسرے فریق کے لیے مصنوعات سازی کرنے والی کمپنیوں میں بھی اب سوفیصد ایف ڈی آئی کی منظوری دی گئی ہے۔ ابھی تک اس میں ایف ڈی آئی کی اجازت نہیں تھی۔