کسانوں کو گیہوں پر 500 روپے فی کوئنٹل بونس دینے کا مطالبہ

آل انڈیا کسان سبھا نے کسانوں کو گیہوں کی کم از کم امدادی قیمت نہ ملنے کا الزام لگایا ہے اور حکومت سے 500 روپے فی کوئنٹل بونس دینے کا مطالبہ کیا ہے۔

کسان سبھا کے جنرل سکریٹری اتل کمار انجان نے پیر کو یہاں جاری بیان میں کہا ہے کہ پرائیویٹ تاجر دیہاتوں میں کسانوں سے کم از کم امدادی قیمت سے کافی کم قیمت پر گیہوں خرید رہے ہیں۔ کئی ریاستوں میں ربیع فصلوں کی خریداری کا مناسب انتظام نہیں ہے جس کی وجہ سے کسان تاجروں کو گیہوں فروخت کر رہے ہیں۔

انہوں نے کہا ہے کہ حکومت کو جلد از جلد کسانوں سے گیہوں کی خریداری کرنی چاہئے۔ پنجاب اور کئی دیگر ریاستوں میں حال میں ہونے والی بارش اور ژالہ باری سے گیہوں کی فصلوں کو نقصان ہوا ہے جس کا معاوضہ بھی دیا جانا چاہئے۔

انجان نے کہا کہ حکومت نے گیہوں کی کم از کم امدادی قیمت 1925 روپے فی کوئنٹل مقرر کیا ہے جبکہ تاجر 1500 روپے فی کوئنٹل کی شرح سے کسانوں سے گیہوں خرید رہے ہیں۔ ریاستی حکومتوں نے کم تعداد میں خریداری مراکز بنائے ہیں جس کی وجہ سے بھی کسانوں کو زبردست پریشانیوں کا سامنا کرنا پڑرہا ہے۔