ریاست کرناٹک میں جاری بحران کے درمیان کانگریس جے ڈی ایس اتحاد اور اپوزیشن بی جے پی نے اپنے تمام اراکین اسمبلی کو ہوٹلوں اور ریزارٹس منتقل کردیا ہے۔
کانگریس اور بی جے پی نے جمعہ کے دن ہونے والے اسمبلی اجلاس کے سلسلہ میں یہ قدم اٹھایا۔ کانگریس نے اپنے اراکین اسمبلی کو تاج وشوا پتر ، جے ڈی ایس اراکین اسمبلی کو پرسٹیج گولف شرائن کلب منتقل کیا گیا ہے۔ بی جے پی کے 82 اراکین اسمبلی رامدا ریسورٹ ، ہنو ہلی ، یلا ہنکا میں تین دن تک قیام کریں گے۔
جمعرات کے دن کانگریس اور جے ڈی ایس کے باغی اراکین اسمبلی سپریم کورٹ کی ہدایت پر اسپیکر سے ملاقات کے لیے بنگلورو آئے تھے تا کہ اسپیکر کے آر رمیش کمار سے ملاقات کی جاسکے اور انہیں استعفے پیش کئے جاسکیں لیکن رات میں واپس ممبئی چلے گئے۔
پچھلے کچھ دنوں سے کانگریس جے ڈی ایس اتحاد کے باغی اراکین ممبئی میں واقع صوفی ٹیل ہوٹل میں مقیم ہیں جن سے بات چیت کے لیے کانگریس رہنما ڈی کے شیوا کمار ممبئی گئے تھے لیکن کامیاب نہیں ہوسکے۔
اس تمام سیاسی بحران کے لیے کانگریس ، بی جے پی کو مورد الزام ٹھہرا رہی ہے اور کانگریس کا کہنا ہے کہ اس بحران کے پیچھے بی جے پی کا ہاتھ ہے اور وہ کانگریس کو اقتدار سے بے دخل کرنا چاہتی ہے جبکہ بی جے پی نے ان الزامات کو مسترد کردیا ہے۔