بھارت کا چین کو دو ٹوک جواب

بھارت نے جموں و کشمیر اور لداخ کے بارے میں تبصرہ کے لیے چین پر سخت تنقید کرتے ہوئے اپنے موقف کا اعادہ کرتے ہوئے کہا کہ چین کو اس معاملے میں مداخلت یا بولنے کا کوئی حق نہیں ہے۔

وزارت خارجہ کے ترجمان انوراگ شریواستو نے ہفتہ واری ورچوئل بریفنگ میں کہا کہ 'اس بارے میں ہمارا موقف ہمیشہ واضح اور مستحکم ہے۔ مرکز کے زیر انتظام علاقے جموں، کشمیر اور لداخ بھارت کے اٹوٹ حصے ہیں اور رہیں گے۔ چین کو بھارت کے اندرونی معاملات میں بولنے کا کوئی حق نہیں ہے اور ہم امید کرتے ہیں کہ وہ ممالک ہمارے اندرونی معاملات پر کوئی تبصرہ نہیں کریں گے جو دوسروں سے اس کی توقع کرتے ہیں۔

انوراگ شریواستو نے کہا کہ بھارت اروناچل پردیش کے بارے میں بھی متعدد بار اپنا موقف واضح کرچکا ہے۔ اروناچل پردیش بھارت کا لازمی اور ناقابل تقسیم حصہ ہے۔ اس حقیقت کو چینی فریق کو اعلی سطح پر کئی بار واضح الفاظ میں بتایا جاچکا ہے۔

واضح رہے سرحدی علاقوں میں حال ہی میں 44 پلوں کا افتتاح کرنے کے بعد وزارت خارجہ کے ترجمان کو چین کے تبصرے پر ردعمل ظاہر کرنے کو کہا گیا تھا۔