انڈین کوسٹ گارڈ کے جوانوں نے تملناڈو کے ناگ وٹینم ساحل پر خراب موسم کی وجہ سے پھنسے چودہ ماہی گیروں کو محفوظ بچا لیا ہے۔
ان ماہی گیروں کی کشتی جنوب۔مغربی مانسون کے سرگرم ہونے کے بعد موسم کے خراب ہونے کی وجہ سے سمندر کے درمیان پھنس گئی تھی۔
وزارت دفاع کی جانب سے جمعہ کو جاری ریلیز کے مطابق چار اگست کو مچھلی کا شکار کرنے والی کشتی جی این سبری سمندر میں پھنس گئی تھی اور وہ بہتی جارہی تھی۔
بیان میں کہا گیا ہے کہ ایک جہاز نے پھنسی ہوئی کشتی کو دیکھا جس کے بعد میری ٹائم ریسکیو کوآرڈی نیشن سینٹر، چنئی کو اس کی اطلاع دی گئی۔ جانکاری ملنے کے بعد آئی ایس جی جہاز شوریہ کو تلاشی اور بچاؤ مہم کے لئے بھیجا گیا۔ شوریہ جہاز کے پھنسی کشتی کے پاس پہنچنے کے بعد ماہی گیروں نے راحت کی سانس لی۔
مچھلی کا شکار کرنے والی کشتی کو کوسٹ گارڈ جہاز کے ذریعہ نزدیک میں واقع مچھلی پکڑنے کے بندرگاہ تک لے جایا گیا جہاں پانچ اگست کو خراب کشتی کی مرمت کی گئی۔ بچاؤ مہم کے دوران کوسٹ گارڈ افسر، کشتی کےمالک اور تملناڈو کے محکمہ ماہی پروری کے افسر مسلسل رابطے میں تھے۔
یہ بھی پڑھیں:تودہ کھسکنے سے 10 افراد کی موت