حیدرآباد پولیس کی بے توجہی سے معصوم طلباء مایوس

حیدرآباد سے تارکین وطن کی نقل مکانی کا سلسلہ جاری ہے روزانہ ہزاروں تارکین وطن اپنی منزل کے لیے روانہ ہو رہے ہیں، لیکن مختلف ریاستوں سے تعلق رکھنے والے طلباء حیدرآباد کے مختلف علاقوں میں پھنسے ہیں اور اپنے وطن جانے کا انتظار کررہے ہیں۔

پولیس نے انہیں پاس تو جاری کردیا ہے لیکن پندرہ روز گزر جانے کے بعد بھی اپنی باری نہ آنے پر بے چینی کا شکار طلباء اس مقام پر پہنچ گئے جہاں سے پولیس تارکین وطن کو روانہ کرتی ہے، لیکن صبح سے شام تک انتظار کے بعد بھی پولیس ان کی جانب توجہ نہیں دے رہی ہے جس سے معصوم طلباء مایوس ہیں۔

آپ کو بتا دیں کہ دینی مدارس میں ماہ شعبان میں تعطیلات کا اعلان ہو جاتا ہے، اپنے وطن واپس جانے کے لیے ان طلباء نے تین ماہ قبل ہی ریلوے ٹکٹ بک کرا لیا تھا لیکن لاک ڈاؤن کے باعث ریل خدمات معطل ہو گئیں، اور ان کے ٹکٹ رد کر دیے گئے۔

بہار سے تعلق رکھنے والے استاد نے بتایا کہ دو دن دن قبل ان کی والدہ کا انتقال ہو چکا ہے لیکن وہ ان کی آخری رسومات میں شریک نہیں ہو سکے لیکن جلد از جلد وہ اپنے گھر پہنچنا چاہتے ہیں، انہوں نے حکومت تلنگانہ سے مطالبہ کیا کہ وہ انہیں وطن روانہ کرنے کا انتظام کرے۔