سوشل میڈیا پر جھوٹی پوسٹ پھیلانے کے خلاف پولیس کمشنر کا انتباہ

حیدرآباد کے پولیس کمشنر انجنی کمار نے سوشل میڈیا پر جھوٹی پوسٹ پھیلانے والوں کو سخت انتباہ دیتے ہوئے کہا ہے کہ ان کے خلاف سخت کارروائی کی جائے گی۔

شہریوں کے نام اپنے پیام میں کمشنر پولیس نے عوام سے اپیل کی کہ وہ سوشل میڈیا کے پلیٹ فارمز پر غیر تصدیق شدہ پوسٹ کو فارورڈ نہ کریں۔
ان کا یہ پیام بعض گوشوں کی جانب سے کشمیر کی صورتحال پر جھوٹی خبروں اور تصاویر کو پھیلانے پر سامنے آیا ہے۔

انہوں نے کہا کہ 'اس طرح کے فسادی افراد کا مقصد شہر حیدرآباد میں لا اینڈ آرڈر کا مسئلہ پیدا کرنا ہے۔ وہ ان واقعات کی تصاویر اور ویڈیوز کا استعمال کر رہے ہیں جس کا ہمارے ملک سے کوئی لینا دینا نہیں ہے۔ کشمیر کے نام پر عراق اور افغانستان کی پرانی تصاویر کو پھیلایا جارہا ہے۔'

انہوں نے شہریوں سے اپیل کی کہ وہ ایسی سازشوں سے چوکس رہیں۔ایسی تصاویر کو فارورڈ کرنے پر فوجداری کارروائی کی جائے گی۔