ممبئی اور مضافات میں موسلادھار بارش

ریاست مہاراشٹر کے دارالحکومت ممبئی اور مضافات کے علاقے بالخصوص تھانے اور رائے گڑھ سمیت کوکن کے دوسرے علاقوں میں جمعہ سے ہورہی زبردست موسلادھار بارش نے عام شہریوں کو شدید متاثر کیا ہے۔ جبکہ محکمہ موسمیات نے مزید تین دن ممبئی کوکن اور تھانے سمیت مختلف حصوں میں بارش کی پیشن گوئی کی ہے۔ تھانے ضلع کلکٹر نے بارش کو دیکھتے ہوئے ہفتہ کو ضلع کے تمام اسکول اور کالجز میں تعطیل کا اعلان کیا ہے۔

ادھر تھانے ضلع میں موسلادھار بارش کا سلسلہ جاری ہے۔
تھانے، کلیان ،الہاس نگر ،بھیونڈی ،ممبرا میں بارش کے پانی کے سبب شاہراہوں پر سفید چادر نظر آرہی ہے۔ کلیان سمیت دیگر ریلوے ٹریکس پر بھی پانی بھرچکا ہے۔ پاتال گنگا، الہاس ندی، گاڑھی ندی، رائے گڑھ کی ندیاں،اورتھانے اور بھیونڈی سے ہوکر گزرنے والی کامواری ندی، الہاس ندی، کالو ندی سمیت دیگر ندیاں خطرے کے نشان سے اوپر چل رہی ہے۔

. تھانے شہر، کلیان ،ممبرا بھیونڈی کی سڑکیں تالاب میں تبدیل ہوگئی ہیں۔ بھیونڈی شہر میں سیلابی صورتحال پیدا ہوگئی ہے۔ مارکیٹ علاقے میں چار سے پانچ فٹ پانی ہونے کے سبب نشیبی علاقے میں واقع مکانات ، دکانوں اور پاورلوم کارخانوں میں پانی داخل ہونے کے سبب خام اور تیار مال سمیت لاکھوں روپے کی املاک تباہ برباد ہونے کا اندیشہ ہے۔