گجرات: سادگی کے ساتھ عید میلاد النبی منانے کی اپیل

کورونا کے قہر کے دوران سادگی کے ستھ تہواروں کو منانے کا سلسلہ جاری ہے۔ ایسے میں 30 اکتوبر کو عید میلاد النبی کا تہوار بھی ہے۔ اس سلسلے میں گجرات کے عالم دین نے عوام سے گذارش کی ہے کہ وہ اس موقع پر کورونا کے گائڈ لائن کا خیال رکھیں۔

ماہ ربیع الاول کی آمد ہے اور اب تک کورونا کا قہر جاری ہے۔ ایسے می‍ں ہر امتی کی ذمہ داری ہے کہ عید میلاد النبی پر بھی کورونا کی گائڈ لائن پر عمل کریں۔ یہ باتیں گجرات کے عالم دین مولانا غلام سید اشرفی نے کہی۔

انہوں نے کہا کہ بہت سارے تہوار کورونا کی نذر ہو گئے۔ یہ پہلا ایسا موقع ہے جب سبھی تہوار سادگی کے ساتھ منائے گئے۔ اس لیے اگر حکومت اس بار عید میلاد النبی کے جلوس کی اجازت نہ دے تو اس تہوار کو سادگی کے ساتھ منایا جائے۔

انہوں نے کہا کہ جس طرح دوسرے تہوار سادگی اور خاموشی سے گھروں میں منائے گئے، اسی طرح عید میلاد النبی بھی سادگی کے ساتھ اپنے گھروں میں منایا جائے۔

انہوں نے لوگوں سے اپیل کی کہ فی الحال اگر حکومت عید میلادالنبی کے جلوس نکالنے کی اجازت نہیں دیتی، تو جذباتی نہ ہوں اور نہ ہی کوئی ایسا قدم اٹھائیں، جس سے مسلم قوم کی بدنامی ہو۔