ریاستی حکومت کی جانب سے جاری کردہ نئی ایڈوائزری کے مطابق کسی بھی تقریب میں زیادہ سے زیادہ صرف 100 افراد کو ہی شریک کیا جا سکتا ہے۔
اترپردیش کے ضلع رامپور میں ای ٹی وی بھارت کے نمائندے نے شادی ہال مالکان سے خصوصی ملاقات کر کے یہ معلوم کیا کہ نئی ایڈوائزری کے بعد اب کس طرح سے تقریبات کا اہتمام کیا جائے گا۔
عالمی وباء کورونا وائرس سے بچاؤ کے لیے مارچ سے مئی تک جہاں ملک بھر میں سخت لاک ڈاؤن نافذ کیا گیا تھا۔ وہیں جون سے لے کر اب ہر ماہ ان لاک سیریز جاری کی گئی۔
اس دوران متعدد سرگرمیوں کی مشروط اجازت دی گئی لیکن شادی بیاہ و تقریبات کے لیے شادی ہال کو دوباہ سے کھولنے کا آغاز ماہ نومبر سے کیا گیا تھا۔
حالانکہ نومبر میں شادیوں کا آغاز ہی ہوا تھا اور صرف چند ہی شادیاں ہو سکی تھیں کہ ایک مرتبہ پھر کورونا وائرس کے بڑھتے کیسز کے پیش نظر ریاستی حکومت کی جانب سے شادی میں مہمانوں کی تعداد محدود کرنے کے لیے نئی ایڈوائزری جاری کی گئی ہے۔
ایڈوائزری میں کہا گیا ہے کہ سماجی فاصلہ کو برقرار رکھنے کے لیے کسی بھی تقریب میں سو سے زائد افراد جمع نہ ہوں۔ اس کو لیکر رامپور میں بینکٹ ہال مالکان تشویش کا اظہار کر رہے ہیں۔