انتخابات جیتنے کے لیے کورونا ویکسین کا لالچ دینا ملک کے ساتھ نا انصافی: این سی پی

این سی پی ترجمان اور ریاستی وزیر نواب ملک نے کہا کہ بی جے پی نے بہار انتخابات جیتنے پر مفت کووڈ ویکسین لگانے کا جو نعرہ دیا ہے وہ پورے ملک کے ساتھ نا انصافی ہے

ریاست مہاراشٹر کے اورنگ آباد میں وزیر وقف نواب ملک نے پریس کانفرنس کی، جس میں انہوں نے کہا کہ بہار انتخابات جیتنے کے لیے بی جے پی نے کورونا ویکسین فراہم کرانے کا لالچ دیا ہے، جو ملک کے ساتھ نا انصافی ہے۔

انہوں نے مودی حکومت پر نکتہ چینی کرتے ہوئے کہا کہ 'نمستے ٹرمپ' کے چکر میں مودی نے ملک کو مصیبت میں جھونک دیا۔

نواب ملک نے کہا کہ ٹرمپ کی محبت میں مودی نے پورے ملک کورونا وبا میں جھونک دیا، کروڑوں لوگ بے روزگار ہو گئے اور لاکھوں موت کے منہ میں چلے گئے اب کورونا کو سیاسی ہتھیار بنا کر عوام کو لالچ دیا جارہا ہے جو کسی بھی لحاظ سے مناسب نہیں۔