پانی کی آس لگائے مئو کے کسان

گیہوں کی فصل لگانے کا سیزن شروع ہوئے تقریباً ایک ماہ ہو چکا ہے، کاشتکار کھیتوں کی جتائی کے آخری مرحلے میں ہیں۔ اب انہیں نہروں میں پانی آنے کا بے صبری سے انتظار ہے۔ فی الحال نہروں میں پانی کی ایک بوند بھی نظر نہیں آرہی ہے۔

ریاست اترپردیش کے ضلع مئو کے درمیان سے گزرنے والی سی سی کینال سوکھی پڑی ہے، 23 کلومیٹر کا رقبہ کور کرنے والی اس نہر کے دونوں جانب گیہوں کے کھیت بوئے جارہے ہیں۔ ان کھیتوں کو پانی کی فوری ضرورت ہے۔ پانی نہ ملنے کی صورت میں گندم کی پیداوار پر براہ راست اثر ہوگا۔

کاشتکاروں کا کہنا ہے کہ نہروں میں پانی کے ساتھ ساتھ صفائی کی بھی سخت ضرورت ہے۔ ایک کسان نے بتایا کہ پانی آئے دو ماہ سے زیادہ ہوگئے، پانی کے بغیر کھیت خراب ہوجائے گا۔

رام وملیندر یادو نے بتایا کہ متعلقہ انتظامیہ اور گرام پردھانوں کی بے توجہی اور جگہ جگہ پمپ سیٹ لگانے سے نہر میں پانی دستیاب نہیں ہے۔ اوپر سے نالوں کی مرمت بھی نہیں ہے، ایسے میں کافی پریشانیوں سے دو چار ہونا پڑ رہا ہے۔

بزرگ کسان رام ہنس نے بتایا کہ نہر صاف ہی نہیں ہے، پانی بالکل نہیں ہے، ہر برس کا یہی حال ہے۔ پانی آتا بھی ہے تو نالوں کی گندگی کی وجہ سے پانی نہیں مل پاتا۔