دارالحکومت دہلی میں ٹریفک کے سخت اصول نافذ کیے جانے کے بعد سے لوگو ں کو مسلسل پریشانی کا سامنا ہے۔
سڑک پر گاڑی لے کر چلنے والا ہر شخص ٹریفک چالان سے خوفزدہ ہے، اور ہر ممکن کوشش کرتا نظر آرہا ہے کہ وہ پولیس کی نظر میں نہ آئے۔
ایسا ہی ایک معاملہ گذشتہ روز دہلی کے روہنی علاقے میں پیش آیا جو خود میں عجیب و غریب ہے، چالان سے بچنے کے لئے ایک شخص نے دہلی پولیس کا یونیفارم زیب تن کرلیا تھا۔
پکڑے جانے کے بعد وہ شخص خود کو دہلی پولیس کا اہلکار بتا رہا تھا، دہلی پولیس نے جب سختی سے اس کی تلاشی لی تب جا کر پتہ چلا کہ وہ پولیس کے بجائے دفاعی اہلکار ہے، اور چالان سے بچنے کے لئے اس نے فرضی پولیس کی شکل بنائی تھی۔
اطلاع کے مطابق دیپک نام کا یہ دفاعی اہلکار چالان سے بچنے کے لیے خود کو دہلی پولیس کا اہلکار بتا کر چالان سے بچنا چاہ رہا تھا۔
دہلی کے منگل پوری علاقے میں تعینات ایس ایس آئی روہتاس اور ابھیشیک شیام نے بتایا کہ گذشتہ شام جب وہ گاڑیوں کی تلاشی لے رہے تھے تبھی ایک بائک سوار شخص بنا ہیلمٹ ٹریفک پولیس کو آتا دکھائی دیا، جس پر پولیس نے اسے رکنے کا اشارہ دیا ،لیکن پولیس کا اشارہ ملتے ہی بائک سوار شخص بھاگنے کی کوشش کر نے لگا۔
اسی وقت ٹریفک پولیس اہلکاروں نے اس کا پیچھا کر اسے پکڑ لیا، جس کے بعد پوچھ تاچھ سے پتہ چلا کہ یہ دفاعی اہلکار دہلی پولیس کا یونیفارم پہن کر کئی دنوں سے اس طرح سڑکوں پر گھوم رہا تھا، پولیس نے تفتیش کے بعد اسے حراست میں لے لیا ہے۔
