دہلی میں 900 لوگوں کو آئیسولیشن وارڈ میں داخل کرایا گیا

دارالحکومت دہلی کے موج پور علاقے میں محلہ کیلنک کے ایک ڈاکٹر میں کورونا وائرس کے مثبت پائے جانے کی اطلاع کے بعد ڈاکٹر کے رابطے میں آئے تقریبا 900 افراد کو کورینٹائن وارڈ میں منتقل کر دیا گیا ہے۔

اطلاعات کے مطابق سعودی عرب سے آئی ایک خاتون نے محلہ کلینک کے ڈاکٹر سے علاج کرایا تھا ۔ یہ خاتون کورونا وائرس سے متاثر تھیں جس سے ڈاکٹر بھی اس کی زد میں آ گئے۔ بعد میں ڈاکٹر کی اہلیہ اور بیٹی بھی متاثر ہو گئیں۔ ڈاکٹر سے 12 سے 18 مارچ کے درمیان علاج کرانے والے تقریباً 900 لوگوں کی شناخت کر کے انہیں قرنطینہ میں رکھا جا رہا ہے۔

واضح رہے کہ بھارت میں یہ وبا بہت تیزی سے پھیل رہی ہے۔ اور دہلی میں اب تک اس کے 25 مصدقہ کیسز سامنے آچکے ہیں جبکہ دو افراد ہلاک بھی ہوئے ہیں۔

دارالحکومت دہلی سمیت ملک بھر میں اس وبا کے پھیلاؤ کو کم کرنے کے لیے 21 دنوں کے لاک ڈاؤن کا اعلان کر دیا گیا جس کا آج دوسرا دن ہے۔