دنیا میں کورونا کی وجہ سے 18 لاکھ افراد ہلاک

عالمی وبا کورونا وائرس کی وجہ سے پوری دنیا میں اب تک تقریباً 18 لاکھ افراد ہلاک ہو چکے ہیں جبکہ 8.24 کروڑ لوگ اس مہلک وائرس کی زد میں آچکے ہیں۔

امریکہ کی جان ہاپکنس یونیورسٹی کے سائنس اور انجینئرنگ سنٹر (سی ایس ایس ای) کے جاری کردہ تازہ ترین اعدادوشمار کے مطابق دنیا کے 191 ممالک میں اب تک کورونا وائرس سے 82،414،714 افراد متاثر ہوئے ہیں جبکہ 17 لاکھ 99 ہزار 99 مریض لقمہ اجل بن چکے ہیں۔

کورونا سے سب سے زیادہ متاثر امریکہ میں مریضوں کی تعداد ایک کروڑ 95 لاکھ سے تجاوز کرگئی ہے جبکہ 3،38،561 افراد مرچکے ہیں۔

امریکہ کے بعد برازیل اور بھارت کورونا سے سب سے زیادہ متاثر ہونے والے دیگر ممالک ہیں۔

بھارت میں کورونا متاثرین کی تعداد ایک کروڑ سے تجاوز کر چکی ہے وہیں برازیل میں یہ تعداد 75 لاکھ کو عبور کر چکی ہے۔