'مسئلہ کشمیر پر کسی بھی ثالثی کی ضرورت نہیں'

امریکی صدر ڈونلڈ ٹرمپ کے مسئلہ کشمیر کے حل پر ثالثی کرنے کے متنازع بیان پر کانگریس رکن پارلیمان ادھیرنجن چودھری نے وزیراعظم نریندر مودی سے ایوان میں جواب دینے کا مطالبہ کیا جس پر وزیر دفاع نے حکومت کا موقف رکھا۔ ان کے جواب دینے سے پہلے ہی کانگریس اراکین ایوان سے واک آؤٹ کرگئے۔

مرکزی وزیر دفاع راجناتھ سنگھ نے کہا کہ مودی اور ٹرمپ کی ملاقات ہوئی تھی لیکن اس ملاقات مین کشمیر مسئلے پر کسی بھی قسم کی بات چیت نہیں ہوئی ہے۔

راجناتھ سنگھ نے کہا کہ 'جیسا کہ وزیر برائے امور خارجہ ایس جئے شنکر نے کہا کہ مسئلہ کشمیر پر امریکی صدر ڈونلڈ ٹرمپ اور وزیراعظم نریندر مودی کے درمیان کوئی تبادلہ خیال نہیں ہوا ہے۔'

انہوں نے واضح لفظوں میں کہا کہ کشمیر مسئلہ پر ہی پاکستان سے بات نہیں ہوگی بلکہ پاکستان کے زیرانتظام کشمیر پر بھی پاکستان سے بات کی جائے گی۔ انہوں نے ایک بار پھر اس بات کا اعادہ کیا کہ جب تک پاکستان، کشمیر میں شدت پسندانہ حملے بند نہیں کرواتا تب تک اس سے بات چیت فضول ہی ہوگی۔