بھارتی جنتا پارٹی کی جانب سے کانگریس پارٹی کی تنقید کرتے ہوئے کہا گیا کہ کانگریس سرخیوں میں بنی رہنے کے لیے الزامات کی سیاست کر رہی ہے۔
کانگریس کی عبوری صدر سونیا گاندھی نے وزیراعظم نریندرمودی کے نام ایک خط لکھا تھا، جس میں انہوں نے حکومت کو کچھ ہدایات پر عمل کرنے کی تجویز پیش کی تھی۔
اس کے بعد بی جے پی ترجمان شاہنواز حسین نے کہا کہ وزیراعظم نریندر مودی نے پہلے سے ہی کووڈ 19 کے پیش نظر پہل کی ہوئی ہے، کانگریس کو پہلے یہ ہدایات ان ریاستوں میں عمل میں لانی چاہیے جہاں کانگریس کی حکومت ہے۔
سونیا گاندھی نے وزیراعظم کو خط میں پانچ ہدایات پر عمل کرنے کی تجویز پیش کی تھی، جس میں حکومت اور پی ایس یوز کے ذریعہ دو سال کے لئے میڈیا اشتہارات اور سینٹرل وسٹا کے خوبصورتی منصوبے کو معطل کرنے پر مکمل پابندی کی تجویز شامل ہے۔
شاہنواز نے سونیا گاندھی اور راہل گاندھی پر تنقید کرتے ہوئے کہا 'اس مشکل گھڑی میں ہمیں متحد ہو کر کورونا وائرس کے خلاف لڑنے کی ضرورت ہے اور یہ وقت سیاسی الزامات عائد کرنے کا نہیں ہے'۔
سونیا گاندھی نے اس سے پہلے کہا تھا کہ حکومت ملک بھر میں لاک ڈاؤن کے لیے مکمل طریقے سے تیار نہیں تھی۔ وہیں راہل نے کہا تھا کہ حکومت نے اس وبا سے نمٹنے کے لیے سہی اقدامات نہیں اٹھائے ہیں۔
شاہ نواز کی جانب سے مزید کہا گیا 'مودی حکومت کی جانب سے ملک کو ایک جٹ کرنے کے لیے اقدامت اٹھائے ہیں اور ساتھ میں ضرورت مندوں کی مدد کے لیے بھی اقدامات کیے گئے ہیں اور ادھر کانگریس ملک میں صرف ڈر پھیلانے میں اپنا وقت گزار رہی ہے'۔