کووڈ 19: دہلی کے وزیر صحت کی حالت میں بہتری

دہلی کی وزارت صحت نے اطلاع دی کہ وزیر صحت ستیندر جین جو کووڈ 19 سے متاثر ہیں پلازما تھراپی سے گذرنے کے بعد ان کی حالت میں بہتری آئی ہے۔ ذرائع نے آج اس بات کی اطلاع دی۔

ذرائع نے بتایا کہ ستیندر جین کی حالت میں بہتری آئی ہے اور پلازما تھراپی کے بعد ان کے بخار میں کمی ہوئی اور آکسیجن کی سطح میں بھی بہتری نوٹ کی گئی۔ ڈاکٹروں نے بتایا کہ انہیں کل عام وارڈ میں منتقل کردیا جائے گا۔

ستیندر جین جو دہلی کی وزارت صحت کے ذمہ دار ہیں کووڈ 19 سے متاثر پائے گئے اور جمعہ کے روز ان کی حالت میں خرابی کے باعث انہیں ساکیٹ کے میکس ہسپتال میں پلازما تھراپی کے عمل سے گذارا گیا ۔

جمعہ کے روز جین کی طبیعت خراب ہوگئی اور پھیپڑوں میں انفکشن بڑھنے کے بعد انہیں آکسیجن پر رکھا گیا تھا انہیں 15 جون کو تیز بخار اور سانس لینے میں تکلیف کی شکایت پر ہسپتال میں داخل کروایا گیا تھا۔