سی اے اے کی مخالفت کرتا ہوں: اشوک گہلوت

ریاست راجستھان کے دارالحکومت جے پور میں واقع شہید اسمارک پر شاہین باغ کی طرز پر خواتین سی اے اے کے خلاف احتجاج کر رہی ہیں۔ یہاں وزیر اعلی اشوک گہلوت نے لوگوں کو خطاب کرتے ہوئے کہا کہ 'میں راجستھان میں سی اے اے اور این آر سی لاگو نہیں ہونے دوں گا۔'

جے پور میں گزشتہ 15 روز سے شہید اسمارک پر سی اے اے کے خلاف احتجاج جاری ہے۔ یہ احتجاج شاہین باغ کی طرز پر کیا جا رہا ہے۔ وزیر اعلی اشوک گہلوت بھی شہید اسمارک پر پہنچے جہاں انہوں نے لوگوں کو خطاب کرتے ہوئے مرکزی حکومت پر تنقید کی۔

انہوں نے کہا کہ کسی کو بھی کوئی پریشانی نہیں ہوگی۔ آج سبھی لوگوں کے ساتھ کاندھے سے کاندھا ملا کر کھڑا ہوں۔

گہلوت نے کہا کہ 'اکثریت کی بنا پر قانون لایا جا رہا ہے۔ میں اس قانون کی مخالفت کرتا ہوں اور راجستھان میں اسے لاگو نہیں ہونے دوں گا۔'

انہوں نے کہا کہ جب آسام میں این پی آر لاگو کیا گیا تو آسام میں 20 لاکھ لوگوں میں سے 16 لاکھ لوگ ہندو نکلے، جس کے بعد وہاں کی حکومت نے اس قانون کو لاگو کرنے سے منع کر دیا۔