امت شاہ کی طبیعت میں بہتری

کورونا انفیکشن سے ٹھیک ہونے کے بعد صحت سے متعلق تکلیف کی وجہ سے مرکزی وزیر داخلہ امت شاہ کو 17 اگست کی رات کو ایمس میں داخل کرایا گیا تھا۔

آل انڈیا میڈیکل سائنس انسٹی ٹیوٹ (ایمس) میں پچھلے دنوں داخل ہوئے مرکزی وزیر داخلہ امت شاہ کی صحت میں بہتری آرہی ہے۔

ذرائع نے بتایا کہ امت شاہ کی صحت اب پہلے سے ٹھیک ہے اور اس میں رفتہ رفتہ بہتری ہورہی ہے۔ ذرائع کا یہ بھی کہنا ہے کہ اگر امت شاہ کی صحت میں اسی رفتار سے بہتری ہوتی رہی تو انہیں اسپتال سے جلد ہی چھٹی دے دی جائے گی۔

واضح رہے کہ دو اگست کو کورونا جانچ رپورٹ مثبت آنے کے بعد امت شاہ کو گروگرام کے میدانتا اسپتال میں داخل کرایا گیا تھا، جہاں سے انہیں 14 اگست کو چھٹی ملی تھی۔ کورونا انفیکشن سے ٹھیک ہونے کے بعد صحت سے متعلق دقت کی وجہ سے انہیں 17 اگست کی رات کو پھر سے ایمس میں داخل کرایا گیا تھا۔