بنگلہ دیش میں پھنسے تبلیغی جماعت کے 32 اراکین کی وطن واپسی جلد

تبلیغی جماعت سے جڑے میوات کے 32 افراد کورونا وائرس کے سبب بنگلہ دیش میں پھنسے ہوئے ہیں۔ ان کو بھارت واپس لانے کی کوششیں تیز ہو گئی ہیں۔

ریاست ہریانہ میں میوات کے 32 تبلیغی جماعت سے جڑے افراد کورونا وائرس کے سبب بنگلہ دیش میں پھنسے ہوئے ہیں۔ ان کو بھارت واپس لانے کی کوششیں کی جا رہی ہیں۔ اس سلسلے میں رکن اسمبلی آفتاب احمد نے ای ٹی وی بھارت کو بتایا کہ انہوں نے بھارت کے وزیر خارجہ ڈاکٹر جے شنکر سے رابطہ قائم کیا ہے اور تحریری شکل میں بھی لکھ کر ان سے اپیل کی ہے۔

اس سلسلے میں فی الحال کارروائی شروع ہو چکی ہے اور 'ہم امید کرتے ہیں کہ تبلیغی جماعت کے سبھی ساتھی بہت جلد میوات میں ہوں گے۔ اسی ضمن میں تبلیغی جماعت کے نوح میں سرپرست مفتی زاہد حسین نے بتایا کہ تازہ اطلاعات کے مطابق 32 اراکین میں سے 15 افراد کے ٹکٹ 31 جولائی کے لئے کنفرم ہو چکے ہیں۔

بقیہ اراکین کے لئے بھی کوشش کی جا رہی ہے اور امید کی جا سکتی ہے کہ 31 جولائی کو جماعت کے سبھی ساتھی اپنے وطن واپس لوٹ آئیں گے۔

واضح رہے کہ میوات سے تبلیغی جماعت کے سبھی 57 غیر ملکی افراد اپنے وطن واپس لوٹ رہے ہیں اور میوات سے سبھی غیر ملکی افراد اپنے وطن جانے کے لئے دہلی روانہ ہو چکے ہیں۔

وہاں سے بھی انڈونیشیا کےافراد اپنے وطن جا چکے ہیں۔ جبکہ بقیہ ممالک کے افراد سفارت خانوں کے رابطہ میں ہیں اور بذریعہ فلائٹ اپنے اپنے ممالک کے لیے جلد ہی روانہ ہوں گے۔