کانگریس کے سابق صدر راہل گاندھی نے وزیر اعظم نریندر مودی کوبراہ راست نشانہ بناتے ہوئے الزام لگایا کہ ان کی غلط پالیسیز کی وجہ سے ملک میں 14 کروڑ نوجوانوں کو بے روزگاری کا سامنا کرنا پڑ رہا ہے۔
مودی کی غلط پالیسیز کی وجہ سے 14 کروڑ نوجوان بے روزگار: راہل گاندھی راہل گاندھی نے اتوار کے روز جاری ایک ویڈیو پیغام میں کہا کہ 'جب مودی وزیر اعظم بنے تو انہوں نے ملک کے نوجوانوں سے وعدہ کیا تھا کہ وہ ہر سال دو کروڑ نوجوانوں کو روزگار فراہم کریں گے۔ ایک بڑا خواب دکھایا، لیکن اس کا سچ یہ سامنے آیا کہ 14 کروڑ نوجوانوں کو ان کی غلط پالیسیز نے بے روزگار کردیا'۔
انہوں نے کہا کہ یہ سب مودی کی غلط پالیسیز، نوٹ بندی، غلط جی ایس ٹی اور پھر لاک ڈاؤن میں ان کے غلط پالیسی اپنانے کی وجہ سے ہوا ہے۔ ان کے ان تین اقدامات نے ملک کے ڈھانچے کو تباہ کر دیا ہے اور اب سچائی یہ ہے کہ بھارت اپنے نوجوانوں کو روزگار نہیں دے سکتا۔ اسی وجہ سے یوتھ کانگریس زمینی سطح پر جا رہی ہے، جو ہر شہر اور قصبے میں اس مسئلے کو سڑکوں پر اٹھائے گی۔
کانگریسی قائد نے کہا کہ 'آپ سب 'روزگار دو' پروگرام سے وابستہ ہوں اور یوتھ کانگریس کے ساتھ مل کر ملک کے نوجوانوں کو روزگار فراہم کریں۔ میں یوتھ کانگریس کو مبارکباد دینا چاہتا ہوں، یہ آپ کا یوم تاسیس ہے، لگے رہیے، بھارت کے نوجوانوں کے لئے یہ لڑائی لڑتے رہیں'۔
