اعظم خان کی حالت دوبارہ تشویشناک

اترپردیش میں رامپور کے رکن پارلیمان اعظم خاں کی طبیعت ایک مرتبہ پھر بگڑ گئی، وہ گذشتہ 20 روز سے لکھنؤ کے میدانتا ہسپتال میں زیر علاج ہیں جہاں آج ان کے پھیپھڑوں میں انفیکشن کی تشخیص کی گئی۔

لکھنؤ کے میدانتا ہسپتال میں اعظم خان کو ایک مرتبہ پھر آکسیجن سپورٹ پر رکھا گیا ہے جبکہ قبل ازیں ان کی طبیعت میں کافی سدھار دیکھا جارہا تھا۔

سماجوادی پارٹی کے قدآور رہنماء اعظم خاں کی طبیعت ایک مرتبہ پھر بگڑنے کے بعد آکسیجن سپورٹ پر رکھا گیا ہے۔ میدانتا ہسپتال کے میڈیکل ڈائریکٹر ڈاکٹر راکیش کپور نے بتایا کہ سی ٹی اسکین کے بعد اعظم خاں کے پھیپھڑوں میں فائبروسز نامی بیماری اور کیویٹی کی بھی تشخیص کی گئی۔ جس کے بعد ان کا آکسیجن سپورٹ بڑھادیا گیا۔

ڈاکٹرز کے مطابق فائبریسز ایک ایسی حالت ہے جو پھیپھڑوں میں زخم اور اکڑن کا موجوب بنتی ہے۔ اس کی وجہ سے جسم کو صحیح مقدار میں آکسیجن مہیا نہیں ہو پاتی جس سے سانس لینے میں کافی دشواریاں پیدا ہوتی ہیں اور قلب سے متعلق مختلف امراض و مسائل رونماء ہو سکتے ہیں۔

انہوں نے کہا کہ فی الحال اعظم خاں کی حالت کافی ناساز ہے اور انہیں کریٹکل کیئر کے ماہر ڈاکٹروں کی نگرانی میں رکھا گیا ہے۔ وہیں ان کے بیٹے عبداللہ اعظم کی حالت مستحکم ہے۔