انجمن فلاح انسانیت کی جانب سے ضرورت مندوں کو کمبل تقسیم

ریاست اترپردیش کے شہر رامپور میں انجمن فلاح انسانیت کی جانب سے آج ضرورت مندوں اور غرباء کے درمیان کمبل تقسیم کئے گئے۔

اس موقع پر تنظیم کے عہدیدار کے علاوہ ایڈیشنل ایس پی ارون کمار سنگھ اور سکھ سیوک جتتھہ کے سردار درشن سنگھ کھرانہ نے بھی شرکت اور انجمن کے اس کام ستائش کی گئی۔

سرد لہروں کے ساتھ موسم سرما کا آغاز ہو چکا ہے۔

ایسے میں جہاں خود کو سردی سے بچانے کے لئے کمبل وغیرہ کا انتظام کیا جائے تو وہیں دوسروں کی فکر کرنا بھی انسانی ہمدردی کا تقاضہ ہے۔

یہی وجہ ہے کہ رامپور میں ایک فلاحی تنظیم انجمن فلاح انسانیت کے کارکنان نے ضرورت مندوں اور غرباء کا خیال رکھتے ہوئے ان کو سردی سے بچانے کے لیے کمبل تقسیم کئے۔

اس موقع پر مہمان خصوصی کے طور پر پہنچے ایڈیشنل ایس پی ارون کمار سنگھ نے انجمن کی ان کوششوں کو کافی سراہا۔

انہوں نے کہا کہ آج مسلم تنظیم کی جانب سے کمبل تقسیم کے اس پروگرام میں تمام ہی مذاہب کے لوگ شامل ہیں اور کمبل حاصل کرنے والوں میں بھی صرف مسلمان ہی نہیں بلکہ دیگر مذاہب کے لوگ بھی بڑی تعداد میں نظر آ رہے ہیں۔

وہیں انجمن فلاح انسانیت کی دعوت پر پہنچے معروف سماجی کارکن سردار درشن سنگھ کھرانہ نے انجمن کی ان کوششوں کو سراہتے ہوئے کہا کہ انجمن کے لوگ پورے دل سے ضرورت مندوں کی مدد کرکے کمبل تقسیم کر رہے ہیں۔

انہوں نے کہا کہ یہاں صرف دو۔چار کمبل نہیں تقسیم کئے جا رہے ہیں بلکہ پورے پانچ سو کمبل یہاں سے تقسیم کئے جا رہے ہیں۔

انجمن فلاح انسانیت کے سرپرست مولانا اسلم جاوید قاسمی نے ای ٹی وی بھارت سے اپنی خصوصی بات چیت میں بتایا کہ رامپور میں ان کی یہ انجمن مسلسل غرباء اور مساکین کی مدد کے لئے کوشاں رہتی ہے۔

یہی وجہ ہے کہ سردی کی لہر کو دیکھتے ہوئے تقریبا 500 ضرورت مندوں کو کمبل تقسیم کئے گئے۔

واضح رہے کہ انجمن فلاح انسانیت کی ان تمام سرگرمیوں کو مفتی محمد ساجد قاسمی کی صدرات میں انجام دیا جا رہا ہے۔