جعلی ڈیتھ سرٹیفکیٹ کے لئے افسر کی پٹائی کرنے والا ملزم گرفتار

ریاست اترپردیش کے رامپور میں تھانہ بلاسپور کی پولیس نے جعلی ڈیتھ سرٹیفکیٹ بنوانے کے لیے دباؤ بنانے اور گاؤں میں تعینات متعلقہ محکمہ کے افسر کے ساتھ مار پیٹ کرنے والے ایک ملزم کو گرفتار کیا ہے۔

ضلع رامپور کے گاؤں مہوناگر میں تعینات دیہی ترقی کے افسر راجیو سنگھ کے ساتھ گرام پردھان کے بیٹے نے مارپیٹ کی تھی، جس کا سوشل میڈیا پر ویڈیو بھی وائرل ہوا تھا۔ اس کے بعد افسر راجیو نے بلاسپور تھانہ میں تحریر دیکر بتایا کہ بدھ کے روز وکاس کھنڈ کے اے ڈی او پنچایت آفس میں گرام مہوناگر کے عثمان خان سمیت چار افراد نے موت کے جعلی سرٹیفکیٹ بنانے کا دباؤ بنایا۔

سرکاری افسر راجیو نے الزام لگایا کہ فرضی سرٹیفکیٹ بنانے سے منع کرنے پر اس کے منھ پر تھوکا گیا اور اس کے ساتھ مارپیٹ کی گئی۔ ساتھ ہی سرکاری دستاویزات کو بھی نقصان پہنچایا گیا۔

تھانہ بلاسپور پولیس نے سرکاری افسر راجیو کے ساتھ گالم اور مارپیٹ کے معاملے میں چار افراد کے خلاف نامزد رپورٹ درج کرکے کارروائی کرتے ہوئے فوری طور پر گرام مہوناگر کے ساکن عثمان خان ولد بدر خان کو گرفتار کیا۔ پولیس کے مطابق دیگر ملزمان کو گرفتار کرنے کے لئے چھاپے مارے جا رہے ہیں۔