Case Registered Against A Journalist سنبھل میں وزیر تعلیم سے سخت سوالات کرنے پر صحافی کے خلاف مقدمہ درج

اترپردیش میں ریاستی وزیر سے سخت سوالات کرنے پر ایک صحافی کے خلاف مقدمہ درج کرلیا گیا ہے۔ صحافی کا ویڈیو سوشل میڈیا پر وائرل ہو رہا ہے۔ اکھلیش یادو نے بھی اس ویڈیو کو ری ٹویٹ کرکے بی جے پی کو شدید تنقید کا نشانہ بنانا۔ Journalist asking questions to the education minister

سنبھل: اترپردیش حکومت میں ثانوی تعلیم کی ریاستی وزیر گلاب دیوی سے سخت سوالات پوچھنے پر صحافی کے خلاف مقدمہ درج کیا گیا ہے۔ ایک پروگرام کے بعد صحافی ریاستی وزیر سے ان کے ترقیاتی ماڈل پر کئی سخت سوالات کئے جس کا جواب دینا ان کے لئے مشکل ہوگیا تھا، جس کے بعد بھارتیہ جنتا پارٹی یووا مورچہ کے رہنما کی تحریر کی بنیاد پر پولیس نے صحافی کے خلاف مقدمہ درج کیا ہے۔ اسی دوران صحافی کا ویڈیو سوشل میڈیا پر خوب وائرل ہو رہا ہے۔ وہیں سماج وادی پارٹی کے قومی صدر اکھلیش یادو نے اس معاملے کو لے کر ایک ٹویٹ کے ذریعے بی جے پی کو نشانہ بنایا ہے۔

یہ معاملہ چندوسی کوتوالی علاقہ کے بدھ نگر کھنڈوا گاؤں سے متعلق ہے۔ یوپی حکومت میں ثانوی تعلیم کی وزیر مملکت گلاب دیوی یہاں ایک پروگرام میں حصہ لینے آئی تھیں۔ پروگرام میں کثیر تعداد میں لوگ موجود تھے۔ اسی دوران ایک نوجوان صحافی مائیک آئی ڈی لے کر وزیر ثانوی تعلیم کے پاس پہنچا اور کہا کہ آپ نے اس گاوں کو گود لیا تھا اور گود لیتے وقت آپ نے یہاں کی ترقی کے لئے حلف بھی لیا تھا لیکن آج تک یہاں کوئی ترقیاتی کام نہیں ہوا، یہاں کی سڑکیں، مندر اور مکانات سب خستہ حال ہیں۔ صحافی نے پروگرام میں شریک لوگوں سے پوچھا کہ کیا آپ گاوں کی ترقی سے مطمئن ہیں جس پر لوگوں نے کہا کہ نہیں۔

بتادیں کہ 2 منٹ 50 سیکنڈ کا یہ ویڈیو سوشل میڈیا پر تیزی سے وائرل ہو رہا ہے۔ تاہم بعد میں بھارتیہ جنتا پارٹی یووا مورچہ کے ضلع جنرل سکریٹری شبھم راگھو کی تحریر پر چندوسی کوتوالی پولیس نے صحافی سنجے رانا کے خلاف بدسلوکی کی دفعات کے تحت مقدمہ درج کر لیا ہے۔ ایف آئی آر کے مطابق وزیر تعلیم نے چیک ڈیم کے افتتاح میں شرکت کی تھی۔ چندوسی کوتوالی انچارج ستیندر سنگھ پوار نے بتایا کہ شبھم راگھو کی تحریر کی بنیاد پر مقدمہ درج کیا گیا ہے دیگر قانونی کارروائی کی جا رہی ہے۔ اس معاملے کو لے کر ایس پی سربراہ اکھلیش یادو نے سماج وادی پارٹی کے میڈیا سیل کے ٹویٹر اکاؤنٹ پر مذکورہ ویڈیو کو ری ٹویٹ کرکے بی جے پی حکومت کو نشانہ بنایا ہے۔ اکھلیش یادو نے ری ٹویٹ میں لکھا ہے کہ سنبھل میں بی جے پی حکومت کی وزیر گلاب دیوی نے ترقی کے معاملے پر سوال پوچھنے پر صحافی کو جیل میں ڈال دیا۔ بی جے پی حکومت میں غیر اعلانیہ ایمرجنسی اور آمریت نہیں تو اور کیا ہے؟ اکھلیش نے کہا کہ بی جے پی صرف سفاکانہ صحافت چاہتی ہے، لیکن ان سے سوال پوچھنا منع ہے۔آپ کو بتا دیں کہ اکھلیش یادو کے ری ٹویٹ کے بعد بدھ نگر کھنڈوا کے سنجے رانا کی آج سنبھل ضلع میں خوب چرچے ہو رہے ہیں۔