افلحہ ناز نے پرانی دہلی کے تمام اسکولوں میں اول مقام حاصل کیا - Old Delhi Topper In CBSE Exam

Old Delhi Topper In CBSE Exam افلحہ ناز کی اس کامیابی کے بعد ای ٹی وی بھارت کے نمائندے نے ان سے خصوصی گفتگو کی جس میں انہوں نے بتایا کہ آئندہ دنوں میں چارٹرڈ اکاؤنٹنٹ کے طور پر اپنا مستقبل تلاشنا چاہتی ہیں۔ ان کے مطابق سبھی لڑکیوں کو تعلیم حاصل کرنی چاہیے وہ کہتی ہیں کہ لڑکیوں کو تعلیم درمیان میں نہیں چھوڑنا چاہئے۔

نئی دہلی:قومی دارالحکومت دہلی کے فصیل بند شہر میں بارہویں جماعت میں افلحہ ناز نے 96.4 فیصد نمبر حاصل کرکے اول مقام حاصل کیا ہے۔دراصل افلحہ ناز حکیم عبد الحمید کے ذریعہ تعمیر کیے گئے رابعہ گرلز پبلک اسکول کی طالب علم ہیں۔ انہوں نے کامرس اسٹریم سے 12 ویں جماعت میں سینٹرل بورڈ آف سیکنڈری ایجوکیشن کے ذریعہ امتحان دیئے تھے۔ اس میں انہوں نے اسکول کے ساتھ ساتھ پرانی دہلی کے تمام اسکولوں میں بھی اول مقام حاصل کیا ہے۔

افلحہ ناز کی اس کامیابی کے بعد ای ٹی وی بھارت کے نمائندے نے ان سے خصوصی گفتگو کی جس میں انہوں نے بتایا کہ آئندہ دنوں میں چارٹرڈ اکاؤنٹنٹ کے طور پر اپنا مستقبل تلاشنا چاہتی ہیں۔ ان کے مطابق سبھی لڑکیوں کو تعلیم حاصل کرنی چاہیے وہ کہتی ہیں کہ لڑکیوں کو تعلیم درمیان میں نہیں چھوڑنا چاہئے۔

افلحہ ناز اپنی اس کامیابی کے بعد سے کافی خوش ہیں۔ ان کے مطابق 13 مئی کی تاریخ ان کی زندگی میں ایک یادگار لمحہ کے طور پر ہمیشہ ان کے دل میں رہے گی۔ افلحہ نے بتایا کہ جب سے نتائج کا اعلان کیا گیا ہے تبھی سے انہیں اور ان کے والدین کو مبارکبادیں مل رہی ہیں۔

اپنی اس کامیابی کے لیے افلحہ ناز رابعہ اسکول کے اساتذہ کا اہم کردار مانتی ہیں۔ ان کے مطابق بچوں کی کامیابی میں ان کے اساتذہ کا اہم کردار رہتا ہے اور رابعہ اسکول میں جس انداز میں طلباء کو تعلیم کے زیور سے آراستہ کیا جاتا ہے۔ وہ دیگر اسکولوں سے کافی مختلف ہے اور وہیں اس اسکول کے طالبات کی کامیابی کا راز ہے۔

افلحہ ناز نے نمائندے سے بات کرتے ہوئے بتایا کہ انہیں امید تو تھی کہیں نہ کہیں کہ وہ بہتر نتائج حاصل کریں گی لیکن انہیں اسکول میں اور پرانی دہلی کے تمام اسکولوں میں اول مقام ملے گا اس کے بارے میں نہیں سوچا تھا اسی لیے ان کی یہ کامیابی خاص ہوجاتی ہے۔