Published : Jul 21, 2024, 10:35 PM IST
مظفر نگر: کانوڑ یاترا کے دوران راستے پر دکانوں کے باہر دکان کے مالک کے نام کی تختی لگانے کے اتر پردیش حکومت کے فیصلے پر نہ صرف اپوزیشن کی جانب سے مخالفت کی جارہی ہے بلکہ این ڈی اے حلیف پارٹیوں نے بھی یوگی حکومت کے فیصلہ پر اعتراض جتایا ہے۔ راشٹریہ لوک دل (آر ایل ڈی) کے صدر اور مرکزی وزیر جینت چودھری نے یو پی حکومت کے فیصلے پر سوال سخت اعتراض کیا اور حکومت سے فیصلہ کو واپس لینے کا طالبہ کیا۔
اترپردیش کے مظفر نگر دورے پر پہنچے جینت چودھری نے کہا کہ ’ہماری پارٹی کے ریاستی صدر نے پہلے ہی اس مسئلہ پر بیان دیا ہے، میرا بھی یہی موقف ہے۔ ہر کوئی یاتریوں کی خدمت کرتا ہے۔ کانوڑ لے جانے والے شخص یا خادم کی کوئی شناخت نہیں ہوتی۔ اس معاملے کو مذہب سے نہیں جوڑا جانا چاہیے’۔ انہوں نے کہا کہ یوگی حکومت کی جانب سے یہ فرمان جلد بازی میں جاری کیا گیا اور مجھے لگتا ہے فیصلہ سوچ سمجھ کر نہیں لیا گیا۔
آر ایل ڈی سربراہ نے کہا کہ ’میرا ماننا ہے کہ اگر کسی ہوٹل میں سبزی خور کھانا تیار ہو رہا ہے تو صرف وہی تیار کیا جانا چاہیے۔ اس سے کوئی فرق نہیں پڑتا کہ کھانا کون پکا رہا ہے‘۔