دہلی کے وزیر اعلیٰ کیجریوال کی عبوری ضمانت میں 7 دن کی توسیع کے لئے درخواست - Kejriwal petitions to Supreme Court

دہلی کے وزیر اعلی اروند کیجریوال نے سپریم کورٹ میں ایک عرضی داخل کی ہے جس میں انہوں نے اپنی ضمانت میں 7 دن کی توسیع کی درخواست کی ہے۔ اروند کیجریوال مبینہ شراب پالیسی گھوٹالے کے سلسلے میں 50 دن جیل میں تھے ابھی فی الحال عبوری ضمانت پر یکم جون تک باہر ہیں۔

نئی دہلی: دہلی کے وزیر اعلی اروند کیجریوال نے سپریم کورٹ میں ایک عرضی داخل کی ہے جس میں طبی بنیادوں پر اپنی عبوری ضمانت میں سات دن کی توسیع کی درخواست دی ہے، واضع رہے کہ اروند کیجریوال مبینہ شراب پالیسی گھوٹالے کے سلسلے میں 50 دن جیل میں رہے ہیں۔

عام آدمی پارٹی نے پیر کو یہ بتایا کہ، "کیجریوال کو 10 مئی کو دہلی کی تہاڑ جیل سے رہا کیا گیا تھا، 50 دن بعد جب وہ مبینہ شراب پالیسی گھوٹالے سے منسلک بدعنوانی کے الزام میں جیل میں تھے اور سپریم کورٹ نے انہیں یکم جون تک ضمانت دینے پر اپنی رضامندی دکھائی تھی۔

عام آدمی پارٹی کے مطابق، دہلی کے وزیر اعلیٰ نے گرفتاری کے بعد جیل میں رہنے کے دوران اپنا 7 کلو گرام وزن کم کیا ہے اور ان کا کیٹون لیول زیادہ ہے جو کسی سنگین بیماری کی طرف اشارہ بھی ہو سکتا ہے۔

"پارٹی نے مزید بتایا کہ ڈاکٹروں نے عآپ کنوینر کو پوزیٹرون ایمیشن ٹوموگرافی اور کمپیوٹنگ ٹوموگرافی (پی ای ٹی ۔ سی ٹی) اسکین اور کچھ دیگر طبی ٹیسٹ کروانے کا مشورہ دیا تھا جس کی وجہ سے کیجریوال نے اپنی عبوری ضمانت میں توسیع کی درخواست کی ہے۔"

"جیل سے رہا ہونے کے بعد، کیجریوال جاری لوک سبھا انتخابات کے لئے انڈیا اتحاد کی مہم میں شامل ہو گئے ہیں۔ کیجریوال کو عام انتخابات کے انتخابی شیڈول کے اعلان کے چند دن بعد، 21 مارچ کو ایکسائز پالیسی کیس میں ڈائریکٹوریٹ آف انفورسمنٹ نے گرفتار کر لیا تھا۔"

دہلی کے وزیر اعلیٰ کی ضمانت یکم جون تک ہے اور کیجریوال کو 2 جون کو حکام کے سامنے خودسپردگی کرنا ہے۔ وہ انتخابی مہم میں حصہ تو لے رہے ہیں لیکن وزیر اعلیٰ کے طور پر اپنے دفتر میں نہیں جا سکتے ہیں۔

"کجریوال کو عبوری ضمانت دیتے ہوئے کچھ شرائط عائد کی گئی تھیں، عدالت عظمیٰ نے کہا کہ وہ کسی بھی گواہ کے ساتھ بات چیت نہیں کریں گے اور نہ ہی کیس سے منسلک کسی بھی سرکاری فائلوں تک رسائی حاصل کریں گے۔"

بنچ نے یہ بھی حکم دیا تھا کہ "وہ موجودہ کیس میں اپنے کردار کے بارے میں کوئی تبصرہ نہیں کریں گے۔وہ اپنی طرف سے دیے گئے بیان کے پابند ہونگے کہ وہ سرکاری فائلوں پر دستخط نہیں کریں گے جب تک کہ دہلی کے لیفٹیننٹ گورنر کی منظوری حاصل نہ ہو۔''

"2024 کے لوک سبھا انتخابات سات مرحلوں میں منعقد ہو رہے ہیں، جو 19 اپریل سے شروع ہوکر یکم جون تک جاری رہیں گے۔ گنتی اور نتائج کا اعلان 4 جون کو کیا جائے گا۔