دفعہ 370 کے حصول کے لیے جدوجہد کرتے رہیں گے: ڈاکٹر غلام نبی بٹ

نیشنل کانفرنس نے امت شاہ کے ایک بیان پر رد عمل دیتے ہوئے کہا کہ خصوصی درجے کی بحالی کیلئے کوشش جاری رہے گی۔

ترال:نیشنل کانفرنس نے وزیر داخلہ امت شاہ کے اس بیان پر شدید ردعمل ظاہر کرتے ہوئے بتایا کہ دنیا میں کوئی چیز ناممکن نہیں ہے اور نیشنل کانفرنس دفعہ 370 کی بحالی کے لیے کوئی بھی دقیقہ فروگزاشت نہیں کرے گی، کیوں جموں وکشمیر کی خصوصی حثیت کا درجہ نیشنل کانفرنس نے ہی دلایا تھا۔ ان باتوں کا اظہار سینیر نیشنل کانفرنس لیڈر و سابق ممبر اسمبلی ترال ڈاکٹر غلام نبی بٹ نے آج ترال میں ورکرس کنونشن سے خطاب کے بعد میڈیا کے ساتھ بات کرتے ہوئے کیا۔

انہوں نے مطالبہ کیا کہ بیرونی ریاست مختلف جیلوں میں مقید قیدیوں کو بلا تاخیر وادی منتقل کیا جائے اور ایسے افراد جن کے خلاف کوئی بڑا کیس نہیں ہے کو رہا کیا جائے تاکہ وہ بھی پرامن زندگی گزار سکیں۔ ڈاکٹر غلام نبی بٹ نے بتایا کہ بی جے پی کو نوشتہ دیوار پڑنا چاہیے کہ پروپگنڈا کرنے کے باوجود وہ کشمیر سے ایک سیٹ بھی حاصل نہیں کر سکی۔ انہوں نے مزید بتایا کہ عمر عبداللہ کی سرکار عوام کی خواہشات پر پورا اترے گی اور اس حوالے سے عوام کو نا امید نہیں ہونے دیا جائے گا۔

واضح رہے گزشتہ روز امت شاہ نے ایک انتخابی ریلی سے خطاب کے دوران کہا تھا کہ اگر اندرا گاندھی سورگ سے واپس بھی آ جائیں اور راہل گاندھی کی چار نسلیں بھی زور لگا لیں، پھر بھی دفعہ 370 کو واپس نہیں لایا جا سکتا ہے۔