پلوامہ کے کاکاپورہ میں گھاس سے لدے ٹرک میں آگ لگ گئی

پلوامہ کی تحصیل کاکاپورہ کے مقامی لوگوں نے برقی کے مناسب ڈھانچے اور فائر و ایمرجنسی سروسز میں عملہ کی تقرری کا مطالبہ کیا۔

پلوامہ : جنوبی کشمیر کے ضلع پلوامہ کی تحصیل کاکاپورہ میں ایک سوکھی گھاس سے بھری چلتی گاڑی میں آگ لگ گئی جس کے بعد فائر اور ایمرجنسی سروسز، مقامی لوگوں اور جموں و کشمیر پولیس نے فوری کارروائی کرتے ہوئے آگ پر قابو پالیا اور آگ کو مزید پھیلنے سے روک دیا۔ کاکاپورہ علاقے کے مقامی لوگوں اور تاجروں نے جب دیکھا کہ سوکھی گھاس سے لدی ایک چلتی گاڑی میں اچانک آگ کے شعلے بھڑکنے لگے تو انہوں نے گاڑی کے ڈرائیور کو رکنے کا اشارہ دیا اور فائر اینڈ ایمرجنسی سروسز کو فون کیا جنہوں نے بروقت آگ پر قابو پالیا۔ اگر مقامی لوگوں کی جانب سے ڈرائیور کو وقت رہتے الرٹ نہ کیا جاتا تو بڑا حادثہ پیش آسکتا تھا۔

مقامی لوگوں نے بتایا کہ علاقے میں بجلی کے ناقص نظام اور فائر اینڈ ایمرجنسی سروسز کا عملہ محدود ہے جس کی وجہ سے اس طرح کے واقعات کے رونما ہونے پر مشکلات پیش آتی ہیں۔ علاقے لوگوں نے لفٹیننٹ گورنر انتظامیہ اور جموں و کشمیر میں بننے والی حکومت سے اپیل کی کہ علاقے میں برقی کے بنیادی ڈھانچے کو بہتر بنایا جائے اور تحصیل میں زیادہ فائر اینڈ ایمرجنسی سروسز میں عملہ کی بھرتی کی جائے تاکہ حادثات کی صورت میں جان و مال کے نقصان کو کم کیا جاسکے۔