فوجداری قوانین سے متعلق بڈگام میں بیداری پروگرام

بڈگام پولیس کی جانب سے فوجداری قوانین کے حوالہ سے تین روزہ بیداری پروگرام کی سراہنا کرتے ہوئے شرکاء نے مستقبل میں بھی اس طرح کے پروگرامز کے انعقاد کی اہمیت پر زور دیا۔

بڈگام: وسطی کشمیر کے بڈگام ضلع میں جموں کشمیر پولیس نے نئے فوجداری قوانین کے بارے میں آگاہی فراہم کرنے کے اپنے سلسلہ وار بیداری مہم کے دوران گورنمنٹ ڈگری کالج ماگام میں ایک خصوصی پروگرام کا انعقاد کیا۔ تقریب میں معروف ماہرین تعلیم، ممتاز شخصیات اور جی ڈی سی ماگام کے طلباء کی خاصی شرکت دیکھنے کو ملی۔

پروگرام میں شرکاء کو نئے فوجداری قوانین کے بارے میں بنیادی جانکاری فراہم کی گئی اور ان کا استعمال کب عمل میں لایا جاتا ہے، ان قوانین میں ’’بھارتیہ ناگرک سرکشا‘‘، ’’بھارتیہ نیای سنہتا،‘‘ اور ’’بھارتیہ ساکشیہ ابھیان‘‘ شامل ہیں۔ شرکاء نے اس طرح کے اہم پروگرام کے انعقاد کے لیے بڈگام پولیس کے کردار کو سراہا اور کہا کہ ایسے پروگرامز سے عام لوگوں خاص کر طلباء کو قوانین کے متعلق جانکاری حاصل ہوتی ہے جس سے وہ کسی بھی غلط کام سے دور رہیں گے۔

دریں اثناء، اس پروگرام میں آفتاب اعوان ایس ڈی پی او ماگام نے بحیثیت مہمان خصوصی شرکت کی جبکہ پرنسپل جی ڈی سی ماگام، اسسٹنٹ پبلک پراسیکیوٹر ماگام، ایس ایچ او ماگام اور آئی سی پی پی ناربل بھی شریک رہے۔ واضح رہے کہ جموں و کشمیر پولیس، لیگل سروسز اتھارٹیز کی جانب سے اس طرح کے پروگرامز کا انعقاد وقتاً فوقتاً کیا جاتا ہے جس میں عوام، صارفین کو قوانین سے متعلق جانکاری فراہم کی جاتی ہے جبکہ قانونی تحفظ اور حکومت کی جانب سے فراہم کردہ مدد کے بارے میں بتایا جاتا ہے۔ علاوہ ازیں سائبر جرائم، عائلی مسائل، گھریلوں تنازعات سے متعلق بھی پروگرامز کے دوران آگاہی فراہم کی جاتی ہے۔