’الٹا چور کوتوال کو ڈانٹے‘: محبوبہ مفتی کا ایم سی سی کی خلاف ورزی پر ایف آئی آر پر ردعمل - Mehbooba Mufti on FIR

چھٹے مرحلے کے تحت اننت ناگ راجوری نشست پر ہوئی ووٹنگ سے قبل جموں کشمیر کی سابق وزیر اعلیٰ محبوبہ مفتی نے ان کی پارٹی کے کارکنان اور پولنگ ایجنٹس کو ہراساں اور گرفتار کرنے کے الزامات عائد کیے اور بجبہاڑہ میں احتجاج بھی کیا۔ جسے انتطامیہ نے ایم سی سی کی خلاف ورزی قرار دیتے ہوئے ان کے خلاف مقدمہ درج کر لیا۔

ایف آئی آر کاپی (Photo: Special Arrangement)

سرینگر (جموں کشمیر) :جموں و کشمیر کی سابق وزیر اعلیٰ اور پیپلز ڈیموکریٹک پارٹی (پی ڈی پی) صدر محبوبہ مفتی نے بدھ کے روز اپنے خلاف درج ایف آئی آر کو ’’الٹا چور کوتوال کو ڈانٹے‘‘ کے مترادف قرار دیا۔ محبوبہ مفتی پر ماڈل کوڈ آف کنڈکٹ (ایم سی سی) کی خلاف ورزی کرنے کے الزام میں ایف آئی آر درج کیا گیا ہے۔

سماجی رابطہ گاہ ایکس پر محبوبہ نے اپنا ردعمل ظاہر کرتے ہوئے کہا: ’’ایم سی سی (MCC) کی خلاف ورزی کرنے کے الزام میں میرے خلاف ایف آئی آر درج کر کے هنسی آئی۔ یہ وہ قیمت ہے جو پی ڈی پی کو سچ بولنے کے لئے ادا کرنی پڑ رہی ہے۔ ہمارا احتجاج حکومت ہند کے خلاف تھا جس نے مقامی انتظامیہ کے ساتھ مل کر ووٹنگ سے پہلے کے اہم اور نازک لمحات میں پی ڈی پی کے سینکڑوں پولنگ ایجنٹس اور کارکنوں کو حراست میں لے لیا تھا۔‘‘

محبوبہ مفتی نے مزید کہا: ’’اسی انتظامیہ نے ہمارے ووٹروں کو خوفزدہ کرنے اور انہیں اپنے ووٹ کا حق استعمال کرنے سے روکنے کے لیے پی ڈی پی کے مضبوط علاقوں میں محاصرہ اور تلاشی کی کارروائیاں شروع کیں۔ الٹا چور کوتوال کو ڈانٹے۔‘‘ محبوبہ نے اپنی پوسٹ کے ساتھ ایف آئی آر کی ایک کاپی بھی منسلک کی، جس میں اشارہ دیا گیا کہ ’’پی ڈی پی کارکنوں نے مین روڈ کو بلاک کیا اور ایک گھنٹے سے زیادہ احتجاج کیا، جو سیکشن 144 سی آر پی سی کی خلاف ورزی ہے۔‘‘

جنوبی کشمیر کے سری گفوارہ، بجبہاڑہ میں اسسٹنٹ ریٹرننگ آفیسر کو بھیجی گئی شکایت میں لکھا گیا ہے کہ: ’’’موضوع‘ ’میڈم محبوبہ مفتی کے خلاف ماڈل ضابطہ اخلاق کی خلاف ورزی کی شکایت‘ کے حوالے سے یہ آپ کے نوٹس میں لانا ہے کہ 25 مئی 2024 کو میڈم محبوبہ مفتی کی قیادت میں پی ڈی پی کارکنان کی ایک بڑی تعداد بجبہاڑہ قصبہ میں جمع ہوئی اور پی ڈی پی کارکنوں کی رہائی کے لیے نعرے لگائے، جو کہ ایم سی سی کی سنگین خلاف ورزی کے مترادف ہے، پی ڈی پی کارکنوں کے بڑے گروپ نے مرکزی سڑک کو بھی بلاک کردیا اور احتجاج کیا۔ بیجبہاڑہ میں ایک گھنٹے سے زیادہ کا اہم مقام، جو دفعہ 144 سی آر پی سی کی خلاف ورزی ہے۔‘‘

اس میں مزید لکھا گیا ہے: ’’دفعہ 144 سی آر پی سی، جو پارلیمانی نشست 3-اننت ناگ-راجوری حلقہ میں متعلقہ ضلع مجسٹریٹ کے جاری کردہ حکم سے نافذ ہے، 4 جون تک ماڈل کوڈ آف کنڈکٹ (ایم سی سی) کے دوران چار افراد کے جمع ہونے پر پابندی عائد ہے۔ مذکورہ حکم کی خلاف ورزی کرتے ہوئے درخواست کی جاتی ہے کہ متعلقہ پولیس اتھارٹی کے ذریعے میڈم محبوبہ مفتی کے ساتھ ان کے شناخت شدہ کارکنوں کے خلاف قواعد کے تحت ضروری کارروائی شروع کی جائے۔‘‘

شکایت میں یہ بھی کہا گیا ہے کہ محبوبہ کے خلاف تعزیرات ہند (آئی پی سی) کی دفعہ 147 (ہنگامہ آرائی کی سزا)، 188 (سرکاری ملازم کے ذریعے جاری کردہ حکم کی نافرمانی) اور اور بجبہاڑہ پولیس اسٹیشن میں عوامی نمائندگی ایکٹ 1951 کی دفعہ 126 اے (انتخابات کے اختتام کے لیے مقرر کردہ گھنٹے کے ساتھ اڑتالیس گھنٹوں کے دوران عوامی جلسوں کی ممانعت) کے تحت مقدمہ درج کیا گیا ہے۔

یاد رہے کہ 25 مئی کو محبوبہ مفتی - جو اننت ناگ راجوری لوک سبھا سیٹ سے پی ڈی پی کی نامزد امیدوار ہیں - نے الزام عائد کیا کہ ان کی پارٹی کے کارکنوں اور پولنگ ایجنٹوں کو ’’بغیر کسی وجہ کے‘‘ تھانوں میں قید رکھا گیا ہے۔ محبوبہ مفتی - جن کی پارٹی 2015 اور 2018 کے درمیان بھارتیہ جنتا پارٹی (بی جے پی) کے ساتھ اتحاد میں تھی، نے یہ بھی دعویٰ کیا کہ ’’الیکٹرانک ووٹنگ مشینوں کے ساتھ چھیڑ چھاڑ‘‘ کی کوششوں سے متعلق شکایات موصول ہو رہی ہیں۔ چھٹے مرحلے کے تحت ہوئی اننت ناگ راجوری نشست پر ووٹنگ کے دوران محبوبہ مفتی نے یہ دعویٰ بھی کیا تھا کہ اس کے موبائل نمبر پر آنے والی کالیں ’بغیر کسی انتظایہ کی نوٹس، یا وجہ / وضاحت کے‘ معطل کر دی گئی تھیں۔ تاہم، اننت ناگ پولیس نے گرفتاریوں کی تصدیق کرتے ہوئے کہا تھا کہ ’’گرفتاریاں بہت کم کی گئی ہیں اور صرف ان لوگوں تک ہی گرفتاریاں محدود کی گئی ہیں جن کے خلاف پولنگ کے دن امن و امان اور سلامتی کو لاحق خطرات کے قابل اعتماد انپٹس ہیں۔‘‘